އަންނަ އަހަރަށް ލަފާކޮށް މަޖިލީހުން ފާސްކުރެއްވި 56.6 ބިލިއަން ރުފިޔާގެ ބަޖެޓުގައި ޚަރަދު ކުޑަކުރުމަށް އަޅާ ފިޔަވަޅުތަކާއެކު 6.6 ބިލިއަން ރުފިޔާ ސަލާމަތްކުރެވޭނެ ކަމަށް އަންދާޒާކުރެވޭ ކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެއެވެ.

އަންނަ އަހަރަށް ދައުލަތުން ލަފާކުރާ ބެޖެޓުގައި ޚަރަދު ކުޑަކުރުމަށް ސަރުކާރުން ވަނީ އަމާޒުހިފާފައެވެ. މިގޮތުން ދައުލަތުން ކުރާ އެންމެ ބޮޑެތި ޚަރަދުތަކުގެ ތެރޭގައި ހިމެނޭ އެކި ސަބްސިޑީތަކާއި، އެކި ޕެންޝަންތައް މުރާޖައާކުރުމަށް ސަރުކާރުންވަނީ ނިންމަވާފައެވެ.

މިގޮތުން އަލަށް ރިޓަޔަރވާ މީހުންނަށް ދައުލަތުން ޕެންޝަން ދިނުން ހުއްޓާލުމަށް ކަނޑައެޅިނަމަވެސް، ޢާންމުންގެ ބައެއް ކަންބޮޑުވުންތައް ހުރުމުން ސަރުކާރުން ވަނީ އެ ނިންމުމަށް އަމަލު ނުކުރުމަށް ނިންމަވާފައެވެ.

ފިނޭންސް މިނިސްޓަރ ވަޒީރު މޫސާ ޒަމީރު ވިދާޅުވީ، ބަޖެޓަކީ ދައުލަތުން ޚަރަދުކުރާނެ ގޮތާއި، ފައިސާ ހޯދާނެގޮތުގެ ޕްލޭނެއް ކަމަށާއި އަދި މުޅިން އަލަށް ކުރާ ބައެއްކަންކަމުގައި ފަށައިގަންނައިރު އިސްލާޙުތަކެއް ގެންނަޖެހިވަޑައިގަންވާނެ ކަމަށެވެ.

މީގެ އިތުރުން، ބަޖެޓުގައި ކަނޑައަޅާފައިވާ ލަނޑުދަނޑިތައް ޙާސިލުވާނެކަމަށާއި، އަދި އިޞްލާހީ ފިޔަވަޅުތަކަށް ކުދި ކުދި ބައެއް ބަދަލު ގެންނެވިނަމަވެސް މަސައްކަތްކުރައްވާނީ ބަޖެޓުގައި ކަނޑައަޅާފައިވާ އަމާޒަށް ވާޞިލުވުމަށްކަމަށްވެސް މިނިސްޓަރ ވިދާޅުވިއެވެ.

ރާއްޖޭގެ އިޤްތިޞާދީ އަދި މާލީ ޙާލަތު މިވަގުތު ގޮތްގޮތުން ރާއްޖޭގެ ޚަރަދުކުޑަކުރުމަށް ބައިނަލްއަޤުވާމީ މާލީ އެކިއެކި އިދާރާތަކުންދަނީ އިރުޝާދު ދެމުންނެވެ.