ސަޢޫދީ ޕްރޯ ލީގުގައި ރޭގައި އަލް އިއްތިހާދު އާއި އަލް ނަޞްރު ބައްދަލުކުރި މެޗުގައި ފަހުވަގުތު އަލް އިއްތިޙާދުން ގޯލުޖަހައި ތާވަލުގެ އެއްވަނައަށް އަރައިފިއެވެ. ރޭގެ މެޗުގައި މި ދެޓީމުގެ ކެޕްޓަނުންގެ ގޮތުގައި ނިކުތީ ކުރިން ރެއާލް މެޑްރިޑަށް އެކީގައި ކުޅުނު ބެންޒެމާއާއި ރޮނާލްޑޯއެވެ.

ރޭގެ މެޗުގައި މި ދެކުޅުންތެރިންވެސް ވަނީ ލަނޑުޖަހާފައެވެ. އެގޮތުން ފުރަތަމަ ގޯލު ޖަހައި އިއްތިޙާދަށް ކުރި ހޯދައިދިނީ ބެންޒެމާއެވެ. މި ގޯލް ޖެހީ މެޗުގެ 55 ވަނަ މިނެޓުގައެވެ. ނަމަވެސް އޭގެ 2 މިނެޓުފަހުން ރޮނާލްޑޯވަނީ އަލް ނަޞްރަށް ގޯލުޖަހައި ނަތީޖާ ހަމަކޮށްދީފައެވެ. މި މެޗުން އަލް އިއްތިޙާދު މޮޅުވިގޯލް ކާމިޔާބުކޮށްދިނީ މެޗުގެ 90 މިނެޓު ހަމަވެ ލިބުނު އިތުރުގަޑީގައި ޓޮޓްނަމްގެ ކުރީގެ ކުޅުންތެރިޔާ ބަރްގްވައިން އެވެ.

ރޭގެ ގޯލުތަކާއެކު ރޮނާލްޑޯ އާއި ބެންޒެމާ ވަނީ ސަޢޫދީ ޕްރޯ ލީގުގައި ގޯލު ޗާޓުގެ ދެވަނައިގައެވެ. އެގޮތުން ދެކުޅުންތެރިންވެސް ވަނީ މިހާތަނަށް ލީގުގައި 10 ގޯލުޖަހާފައެވެ. ގޯލު ޗާޓުގެ އެއްވަނައިގައި އޮތީ އަލް ޙިލާލް ގެ ފޯވާޑް މިޓްރޮވިޗެވެ. އަދި ރޮނާލްޑޯ ރޭގައި ޖެހި ގޯލާއެކު އޭނާ ވަނީ 2024 އަހަރުގައި ޖުމްލަ 43 ގޯލުޖަހައިދީފައެވެ.

ރޭގެ ނަތީޖާއާއެކު އަލް އިއްތިޙާދު ތާވަލުގެ އެއްވަނައަށް އެރިއިރު އަލް ނަޞްރު ވަނީ ތާވަލުގެ 4 ވަނައަށް ވެއްޓިފައެވެ.