ރައީސް ޑރ. މުހައްމަދު މުއިއްޒަށް ރާއްޖޭގެ ފުރަތަމަ ރައީސް މުހައްމަދު އަމީނަށް ހެދި ގޮތް ހަދާފާނެ ކަމަށް ބުނެ އެމްޑީޕީގެ އެކްޓިވިސްޓަކު ދެއްކި ވާހަކައެއް ދިފާއުކޮށް އެމްޑީޕީގެ ޗެއާޕާސަން ފައްޔާޒް އިސްމާއިލް ދެއްކި ވާހަކައަކީ ކަނޑައެޅިގެން ޓެރަރިޒަމަށް ހިތްވަރުދިނުންކަމަށާއި އެކަން ސީރިއަސްކަމާއެކު ބަލަންޖެހޭނެކަމަށް ރައްޔިތުންގެ މަޖިލީހުގެ ރައީސް އަބުދުއްރަޙީމް ޢަބުދުﷲ ވިދާޅުވެއްޖެއެވެ.

އެމްޑީޕީން އިއްޔެ ބޭއްވި ނޫސްވެރިންގެ ބައްދަލުވުމެއްގައި ފައްޔާޒް ވަނީ ކުޅުދުއްފުށީގައި އެ ޕާޓީން ބޭއްވި ޖަލްސާއެއްގައި މީހަކު ދެއްކި ވާހަކާއި ގުޅުވައި "ރައްޔިތުންނަށް ދެރަ ދިނީމަ ހަދަން ޖެހޭނީ އަމީނަށް ހެދި ގޮތް" ކަމަށް ވިދާޅުވެ، ރައީސް މުޢިއްޒު އަވަހާރަކޮށްލަން ހިތްވަރުދީ ވާހަކަ ދައްކާފައެވެ.

މި ވީޑިއޯ ހިއްސާ ކުރަށްވައި އަބުދުއްރަޙީމް އެކްސްގައި ކުރެއްވި ޕޯސްޓެއްގައި ވިދާޅުވީ ''މިއީ ކަނޑައެޅިގެން ޓެރަރިޒަމަށް ހިތްވަރުދިނުން.'' ކަމަށެވެ.

''މިއީ ކަމާގުޅޭ މުއައްސަސާތަކުން ވަރަށް ސީރިއަސްކަމާއެކު ވަގުތުން ބަލަންޖެހޭކަމެއްކަމެއް.ޢަމުދުން އިދިކޮޅު ސިޔާސީ ޕާޓީގެ އެންމެ އިސް މަގާމުގައި ހުންނެވި ބޭފުޅަކު މިފަދަ ވާހަކައެއް ދެއްކުމަކީ އާދައިގެކަމެއްކަމަށް ބަލައިގެންނުވާނެ.'' އަބުދުއްރަހީމް ވިދާޅުވެފަވެއެވެ.

އަބުދުއްރަހީމްގެ އިތުރުން ސަރުކާރުގެ ވަޒީރުންނާއި، އާންމުންނާއި އެކިއެކި ސިޔާސީ ބޭފުޅުން ވެސް އަންނަނީ އެކަން ކުށްވެރިކޮށް އެކަން ބަލަންޖެހޭކަމަށް ބުނަމުންނެވެ.