މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ޑިރެކްޓަރުންގެ ބޯޑަށް ދަހާ ޝުއައިބު އައްޔަންކުރަން ރައްޔިތުންގެ މަޖިލީހުން މިއަދު ރުހުން ދީފި އެވެ.

ދަހާއަށް ރުހުންދީފައިވަނީ 69 މެންބަރުންގެ އިއްތިފާގުންނެވެ.

ކޮމިޓީން ކުރި އިންޓަވިއުން ދަހާއަށް 96.61 އިންސައްތަ ލިބިފައިވެ އެވެ.

މިދިޔަ ހޯމަ ދުވަހު ރައްޔިތުންގެ މަޖިލީހަށް ރައީސް ޑރ. މުހައްމަދު މުއިއްޒު ފޮނުއްވި ސިޓީފުޅު ސިޓީފުޅުގައި ވަނީ ހުސްވެފައިވާ މެންބަރުކަމުގެ މަގާމަށް އާންމުކޮށްގެން ހުޅުވާލައިގެން ކުރިމަތިލެއްވި ބޭފުޅުންގެ ތެރެއިން ޝަރުތު ހަމަވާ ބޭފުޅުންގެ ނަންތައް ފޮނުވާފައިވާ ކަމަށެވެ. އަދި އެ ނަންތައް ފޮނުވާފައިވާ ތަރުތީބުން އިސްކަންދެއްވައިގެން އެ މައްސަލަ ދިރާސާކޮށްދިނުމަށް ރައީސް އެދިވަޑައިގެންފައިވެ އެވެ.

ދެން ފޮނުވި 4 ބޭފުޅުންނަށް ލިބިފައިވަނީ 75 އިންސައްތައަށް ވުރެ ދަށް މާކްސްއެކެވެ.

އެ މައްސަލަ ދިރާސާކޮށް އެކުލަވާލި ރިޕޯޓް ހުށަހަޅުއްވައިދެމުން އެ ކޮމިޓީގެ މުގައްރިރު, ފުވައްމުލަކު މެދު ދާއިރު މެންބަރު އަލީ ފަޒާދު ވިދާޅުވީ ދަހާއަކީ އިލްމީ ގާބިލުކަމާއި ޓެކްސްގެ ދާއިރާގެ ތަޖުރިބާހުރި, ކުރިއެރުމަށް އާންމު ތަސައްވުރެއް ގެންގުޅޭ ފަރާތެއްކަން ފާހަގަކުރެވިފައިވާ ކަމަށެވެ.