މި އަހަރުގެ ފުރަތަމަ ހަތް މަސްދުވަހުގެ ތެރޭގައި ދައުލަތަށް ޓެކްސްގެ ގޮތުގައި 15 ބިލިއަން ރުފިޔާ ލިބިފައިވާކަމަށް މީރާއިން ހާމަކޮށްފިއެވެ.

މިއީ މިދިޔަ އަހަރުގެ މި މުއްދަތާ އަޅާބަލާއިރު 7 ޕަސެންޓުގެ ކުރިއެރުމެކެވެ. މިދިޔަ އަހަރު މި މުއްދަތުގައި ދައުލަތަށް ލިބިފައިވަނީ 14 ބިލިއަން ރުފިޔާއެވެ.

ދައުލަތަށް އެންމެ ގިނަ އާމްދަނީ ލިބިފައިވަނީ ޓީޖީއެސްޓީންނެވެ. މި އަހަރުގެ ފުރަތަމަ ހަތް މަހު ޓީޖީއެސްޓީގެ ގޮތުގައި 5.9 ބިލިއަން ރުފިޔާ ލިބުނުއިރު، މިއީ މިދިޔަ އަހަރަށްވުރެ 400 މިލިއަން ރުފިޔާ އިތުރު އަދަދެކެވެ. ޖީއެސްޓީގެ ގޮތުގައި 2.8 ބިލިއަން ރުފިޔާ ލިބިފައިވެއެވެ.

އިންކަމް ޓެކްސްގެ ގޮތުގައި 4.9 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރަށްވުރެ 500 މިލިއަން ރުފިޔާ އިތުރު އަދަދެކެވެ. އެހެންނަމަވެސް، ވިޔަފާރީގެ ފައިދާއިން ލިބުނު ޓެކްސް 80 ޕަސެންޓު ދަށަށް ގޮސް، މި އަހަރުގެ ފުރަތަމަ ހަތް މަހު ލިބިފައިވަނީ 17 މިލިއަން ރުފިޔާއެވެ.

ޓެކްސް ފިޔަވައި ދައުލަތަށް އެންމެ ބޮޑު އާމްދަނީއެއް ލިބިފައިވަނީ ޓޫރިޒަމް ލޭންޑް ރެންޓުންނެވެ. މި އަހަރުގެ ހަތް މަހު ބިލިއަނެއްހާ ރުފިޔާ ލޭންޑު ރެންޓުގެ ގޮތުގައި ލިބުނުއިރު، އެއަރޕޯޓު ޑިވެލޮޕްމަންޓް ފީގެ ގޮތުގައި 670 މިލިއަން ރުފިޔާ ލިބިފައިވެއެވެ.