ރައީސުލްޖުމްހޫރިއް ޑޮކްޓަރ މުޢިއްޒުގެ ވިސްނުންފުޅަކީ ކޮންމެ ކަމެއްގައިވެސް ރައްޔިތުންނަށް އެންމެ ލުއިފަސޭހަގޮތް ހޯއްދަވައި ދެއްވުން ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.

މިނިސްޓަރު މިފަދައިން ވިދާޅުވީ އެއްގަމު އުޅަނދާއި ކަނޑު ދަތުރުފަތުރުކުރާ އުޅަނދުފަހަރުތަކުން ނުދެއްކި ހުރި އަހަރީ ފީ އާއި ޖޫރިމަނާ ފައިސާ ބަހާލައިގެން ދެއްކޭނެ ގޮތް ހެދުމަށް ގަވާއިދެއް އެކުލަވާލައި ގެޒެޓްކުރުމާ ގުޅިގެން ކުރެއްވި އެކްސް ޕޯސްޓެއްގައެވެ.

މިނިސްޓަރު ވަނީ ޤަވާޢިދުގެ ދަށުން ކޮންމެ ބޭފުޅަކަށްވެސް އެއްގަމު އުޅަނދާއި ކަނޑު އުޅަނދުފަހަރުން ކޮންމެ އަހަރަކު އެއް ފަހަރު ދައްކަންޖެހޭ އަހަރީ ފީ އާއި ޖޫރިމަނާގެ ފައިސާގެ ތެރެއިން ދައުލަތަށް ދައްކަންޖެހި ނުދެއްކިހުރި ފައިސާ، ބަހާލައިގެން ދެއްކުމުގެ ފުރުޞަތު ހުޅުވާލެވިފައިވާކަން ފާހަގަކުރައްވައި ރައީސް ޑރ މުޢިއްޒުގެ ވިސްނުންފުޅަކީ ކޮންމެ ކަމެއްގައިވެސް ރައްޔިތުންނަށް އެންމެ ލުއިފަސޭހަގޮތް ހޯއްދަވައި ދެއްވުންކަން ފާހަގަކުރައްވާފައެވެ.

ޓްރާންސްޕޯޓް މިނިސްޓްރީން އިއްޔެ އާންމުކުރި ގަވާއިދުގައިވާ ގޮތުން، ކަނޑު ދަތުރުފަތުރު ކުރާ އުޅަނދުތަކާއި އެއްގަމު އުޅަނދުފަހަރު ތަކުން އަހަރީ ފީ އާއި ޖޫރިމަނާ ފައިސާ އެއްފަހަރާ ދައްކަން ދަތިވާ ފަރާތްތަކަށް ވަކި ޝަރުތުތަކެއް ފުރިހަމަވާނަމަ ބަހާލައިގެން ފައިސާ ދެއްކޭނެ އެވެ.ބަހާލައިގެން ފައިސާ ދެއްކުމުގެ ޝަރުތު ހަމަވަނީ ދައުލަތަށް ދައްކަންޖެހި ނުދެއްކި ހުރި ފައިސާގެ އަދަދު 10،000 ރުފިޔާއަށްވުރެ ބޮޑުވުމާއި، ފައިސާ ދެއްކުމުގެ ސުންގަޑި ހަމަވެފައިވުމާއި، ގަވާއިދުގެ ދަށުން ފައިސާ ބަހާލައިގެން ދައްކަން އަމިއްލައަށް ހުށަހެޅުމާއި މީގެކުރިން ބަހާލައިގެން ފައިސާ ދެއްކުމުގެ ފުރުސަތު ދީފައިވާ ފަރާތަކަށް ނުވުމާއި، އުޅަނދުގެ ވެރިފަރާތް ކަމުގައިވުމެވެ.

ގަވާއިދުގައި ބުނެފައިވާ ގޮތުން އުޅަނދުތަކުގެ އަހަރީފީ އަދި ޖޫރިމަނާގެ ފައިސާ ބަހާލައިގެން ދެއްކުމަށް އެދި ހުށަހަޅާނީ އެކަމަށް ހާއްސަ ފޯމަކުންނެވެ. އެ ފޯމު ހުށަހެޅުމުން 10 ދުވަސްތެރޭގައި މިނިސްޓްރީން ކޮމިޓްމަންޓް ފީއެއް ކަނޑައަޅަން ޖެހޭ ކަމަށްވެސް ގަވާއިދުގައިވެ އެވެ. ކޮމިޓްމަންޓް ފީ 14 ދުވަސްތެރޭ ދައްކަން ޖެހޭ އިރު މި މުއްދަތުގައި އެ ފައިސާ ނުދެއްކިިއްޖެ އެ ފުރުސަތު އެމީހަކަށް ގެއްލޭނެ އެވެ.

އަދި އެ ފޯމު ހުށަހެޅި ފަރާތާއި މިނިސްޓްރީއާއި ދެމެދު އެއްބަސްވުމެއް ހަދަންޖެހޭ ކަމަށްވެސް ގަވާއިދުގައި ބުނެފައިވެ އެވެ.އެއްބަސްވުމުގައި ސޮއިކުރާތާ 30 ދުވަސް ތެރޭ ފައިސާ ނުދައްކައިފިނަމަ، އެއްބަސްވުން ބާތިލް ކުރުމުގެ އިހްތިޔާރު މިނިސްޓްރީއަށް އޮންނާނެ ކަމަށް ވެސް ގަވާއިދުގައިވެ އެވެ.