ޓޫރިޒަމް ދާއިރާގެ ޖީއެސްޓީ ނުވަތަ ޓީޖީއެސްޓީ ރޭޓަށް ބަދަލު ގެނައުމަށް ނިންމާފައިވާތީ ފަތުރުވެރިކަމުގެ ދާއިރާގައި ހިދުމަތްތައް ދޭ ފަރާތްތަކުން އެކަމަށް ތައްޔާރުވުމަށް އިލްތިމާސްކޮށްފިއެވެެ.

ކޮމިޝަނާ ޖެނަރަލް އޮފް ޓެކްސޭޝަން ހަސަން ޒަރީރު ސޮއިކުރައްވައި ނެރުއްވާފައިވާ ސާކިއުލާގައި ވަނީ މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް ގެނައި ހަތްވަނަ އިސްލާހުގެ ދަށުން ކުރިއަށް އޮތް 2025 ވަނަ އަހަރުގެ ޖުލައި އެއްވަނަ ދުވަހުން ފެށިގެން ޓޫރިޒަމް ދާއިރާގެ ޖީއެސްޓީ ރޭޓް 17 ޕަސަންޓަށް ބޮޑުވާނެ ކަން ހަނދާންކޮށްދީ މި ތާރީހުން ފެށިގެން ޓޫރިޒަމް ދާއިރާގެ މުދަލާއި ޚިދުމަތުގެ މުޢާމަލާތްތަކުން ޖީއެސްޓީ ނަގަންވާނީ އައު ރޭޓުކަމަށް ބުނެފައެވެ.

ވުމާއެކު ވީމާ 1 ޖުލައި 2025 އިން ފެށިގެން އާ ރޭޓުގައި ޖީއެސްޓީ ނެގުމަށްޓަކައި ސިސްޓަމްތަކަށް ގެންނަންޖެހޭ ބަދަލުތައް ގެނައުމަށާއި، ޓޫރިޒަމް ދާއިރާގެ މުދަލާއި ހިދުމަތުގައި އެ ތާރީހުން ފެށިގެން އާ ރޭޓުތައް ހިމަނައިގެން އަގު ޖެހުމަށްޓަކައި ކުރަންޖެހޭ ކަންތައްތައް ދުރާލައި ރާވައިގެން ކުރިއަށް ގެންދިއުމަށް ސާކިއުލާގައިވަނީ އިލްތިމާސްކޮށްފައެވެ.އަންނަ އަހަރުގެ ޖުލައި އެއްވަނަ ދުވަހުގެ ނިޔަލަށް ޓޫރިޒަމް ދާއިރާގެ ޖީއެސްޓީ ރޭޓަކީ 16 އިންސައްތައެވެ.

މިކަމާ ގުޅޭ ގޮތުން އިތުރު މައުލޫމާތު ސާފުކުރައްވަން ބޭނުންފުޅުވާނަމަ 1415 އަށް ގުޅުއްވުން ނުވަތަ mv.gov.mira@1415 އަށް އީމޭލްކުރެއްވުމުން އިތުރު މައުލޫމާތު ލިބޭނެއެވެ.