ހއ. އިހަވަންދޫގައި ޑޮކްޔާޑެއް ތަރައްޤީކުރުމަށް މޯލްޑިވްސް ޕޯޓްސް ލިމިޓެޑް، އެމްޕީއެލްއާއި އެ ރަށު ކައުންސިލުން އެއްބަސްވުމެއްގައި ސޮއިކޮށްފިއެވެ.

އެމްޕީއެލްގެ ފަރާތުން މި އެއްބަސްވުމުގައި ސޮއިކުރެއްވީ ސީ.އީ.އޯ މުހައްމަދު ވަޖީހް އިބްރާހީމް އެވެ. އަދި އިހަވަންދޫ ކައުންސިލްގެ ފަރާތުން ސޮއިކުރެއްވީ އެ ކައުންސިލްގެ ރައީސް އަޙުމަދު ސަބާހުއެވެ.

Ad by Hajj Corporation

އެމްޕީއެލްގެ ސީއީއޯ އިބްރާހީމް ވަޖީހު ވިދާޅުވީ، މި ސަރުކާރުން ރާއްޖޭގައި ބަންކަރިންގެ ޚިދުމަތް ފެށުމާއެކު މި ސަރަހައްދުން ދަތުރުކުރާ ބޭރުގެ އުޅަނދުތަކުގެ ފަރާތުން ޓެކްނިކަލް އެކިއެކި ކަންކަމަށް ރިކުއެސްޓް ލިބޭ ކަމަށާއި މި ޑޮކްޔާޑުން އެ އުޅަނދުތަކަށް ޓެކްނިކަލް ސަޕޯޓް ލިބިގެންދާނެކަމަށެވެ.

މި ޑޮކްޔާޑުގެ މަސައްކަތް ވީހާވެސް އަވަހަށް ފެށިގެންދާނެ ކަމަށާއި، ޑޮކްޔާޑު ހެދުމަށް އިހްވަންދޫއިން އެއްލައްކަ އަކަފޫޓުގެ މިހާރު ބިން ހިއްކާ ސަރަހައްދުން ދީފައިވާނެ ކަމަށް އިހަވަންދޫ ކައުންސިލްގެ ރައީސް ވަނީ ވިދާޅުވެފައެވެ.

އަންނަ އަހަރު މި ޑޮކްޔާޑުގެ އަމަލީ މަސައްކަތް ފެށުމަށް އަމާޒު ހިފާފައިވާއިރު، މިހާރު ވަނީ ބިން ވެސް ހަމަޖެހިފައެވެ. ވަޖީހު ވިދާޅުވީ، މި ޑޮކްޔާޑުން މަސްވެރިންނަށް ޚިދުމަތް ލިބޭނެ އިންތިޒާމް ހަމަޖައްސައިދިނުމަށް ގިނަ މަސްވެރި އުޅަނދުތަކުން އެދެމުންދާ ކަމަށެވެ.

އެކުންފުނިން ބުނީ މި ޑޮކްޔާޑުގެ މަސައްކަތް ނިމި 6 މަސްދުވަހުގެ ތެރޭގައި ޚިދުމަތްދޭން ފެށޭނެކަމަށެވެ.

އެމްޕީއެލް އިން އިހަވަންދޫގައި ޑޮކްޔާޑެއް ހަދަން އެެއްްބަސްވުމުގައި ސޮއިކޮށްފައިވާއިރު، މި ޚިދުމަތް ކުޅުދުއްފުށީގައި ވެސް ދިނުމަށް އަންނަނީ މަސައްކަތް ކުރަމުންނެވެ.