ގޯލްޑް ކަޕްގައި ގަދަފަދަ މާލެ ސިޓީ ދެވަނަފަހަރަށް ބަލިކުރުމަށްފަހު ފައިނަލުގެ ފުރަތަމަ ޖާގަ އޭދަފުށިން ހޯދައިފިއެވެ. މިމެޗު އޭދަފުށިން ކާމިޔާބުކުރީ 3-2 އިންނެވެ.

ވާދަވެރި ކުޅުމެއް ފެނުނު މިމެޗުގެ އޭދަފުށީގެ 3 ގޯލުވެސް ޖެހީ ފުރަތަމަ ހާފުގައެވެ. އެގޮތުން އޭދަފުށީގެ ފުރަތަމަ ގޯލުޖެހީ މެޗުގެ 19 ވަނަމިނެޓުގައި އޭދަފުށީގެ ޤައުމީ ޓީމަށް ކުޅޭ ހަމްޒާ މުޙައްމަދު (ހަމްޕު) އެވެ. މެޗުގެ ދެވަނަ ގޯލުޖެހީވެސް ހަމްޕުއެވެ. ފުރަތަމަ ގޯލުޖެހިތާ 5 މިނެޓުފަހުން އޭދަފުއްޓަށް ލިބުނު ހިލޭ ޖެހުމެއްގައި އައިހަމް ފޮނުވާލި ބޯޅަ ބޮލުން ޖަހައި ގޯލަށް ވައްދާލީ ހަމްޕުއެވެ. އަދި މެޗުގެ 29 ވަނަ މިނެޓުގައި އީޝާން އިބްރާހީމް ވަނީ އޭދަފުއްޓަށް އިތުރު ގޯލެއް ޖަހައި ލީޑު ފުޅާކޮށްފައެވެ.

އޭދަފުށިން 3 ގޯލުގެ ލީޑެއް ނެގިފަހުން މާލެ ސިޓީއިން ވަނީ ކުޅުން ރަނގަޅުކޮށްފައެވެ. އެގޮތުން 2 ވަނަ ހާފުގެ 2 ވަނަ މިނެޓުތެރޭގައި މާލެ ސިޓީގެ އަލީ ޝިޔާހު ވަނީ އޭރިޔާގެ ބޭރުން ގޯލެއް ޖަހާ މާލެ އަށް އުއްމީދު އާކޮށްދީފައެވެ. އަދި މެޗުގެ 63 ވަނަ މިނެޓުގައި މާލެ ސިޓީގެ އަހުނާފް އޭރިޔާގެ ތެރެއިން ބޯޅަހިފައިގެން ކުރިޔަށް ދާން އުޅުމުގެ ތެރޭގައި އޭދަފުށީގެ ޑިފެންޑަރު ކުރި ފައުލަކާއި ގުޅިގެން ލިބުނު ޕެނަލްޓީއަކުން ގޯލުޖަހައިދިނީ ރިލްވާން ވަހީދުއެވެ.

މި މޮޅާއެކު ގޯލްޑްކަޕްގެ ފައިނަލުގެ ފުރަތަމަ ޖާގަ އޭދަފުށިން ވަނީ ކަށަވަރުކޮށްފައެވެ. ފައިނަލުގެ ފަހުޖާގަ ލިބޭނީ މިރޭ އައްޑޫ ސިޓީ އާއި އަލިފުށި ބައްދަލުކުރާ މެޗުން މޮޅުވާ ޓީމަކަށެވެ.