ގޯލްޑް ކަޕްގެ ފައިނަލު މެޗުގައި މާދަމާރޭ އައްޑޫ ސިޓީއާއި އޭދަފުށި ބައްދަލުކުރާ މެޗުގެ ޓިކެޓް މިއަދު ހަވީރު ވިއްކަން ފަށައިފިއެވެ. އެގޮތުން މާދަމާ ރޭގައި ކުޅޭ މެޗަށް މިއަދު ޓިކެޓް ވިއްކާ ގަލޮޅު ދަނޑު ކައިރީގަ އެއްގަޑިއިރަށްވުރެ ކުރިން ސަޕޯޓަރުން ވަނީ ކިޔޫހަދާފައެވެ.

Ad by Hajj Corporation

މުބާރާތުގެ ފައިނަލް މެޗަށް ކޮންމެ ޓީމަކަށް ހާއްސަކޮށް 600 ޓިކެޓު ވިއްކަން ހަމަޖެހިފައިވާއިރު، އައްޑޫގެ ޓީމަށް ހާއްސަކޮށްފައިވާ ޓިކެޓުތައް، އެންމެ 20 މިނެޓުތެރޭގައި ވަނީ ވިކި ހުސްވެފައެވެ.

މުބާރާތުގެ ޓިކެޓުތަކުގެ އަގަކީ ސިޑިބަރިން 30 ރުފިޔާ އަދި ގޮނޑިބަރިން 50 ރުފިޔާއެވެ. އެގޮތުން މީހަކަށް ވިއްކާނީ ގިނަވެގެން 5 ޓިކެޓެވެ.

މިމުބާރާތަކީ ރާއްޖޭގެ އެންމެ ގިނަ ބަޔަކު ބަލާ އަދި އެކުޅިވަރަށް އެންމެ މަރުދޭ ކުޅިވަރު ފުޓްބޯޅައިގެ ނިމެމުންދާ ހުޅުކޮޅުގައި އަލުން ދިރުވުމެއް ގެނައުމަށް ސަރުކާރުން އިސްނަގައިގެން މުޅި ރާއްޖެއަށް ހުޅުވާލައިގެ 'އަލުން ދަނޑަށް' ޝިޔާރުގެ ދަޢުން 90 ޕްލަސް އާއި ސްޕޯރޓްސް މިނިސްޓްރީއިން އިންތިޒާމް ކުރާ މުބާރާތެކެވެ.

މިމުބާރާތުގެ ޗެންޕިއަން ޓީމަށް 100،000 ރުފިޔާ އާއި ރަނަރަފް ޓީމަށް 50،000 ދޭގޮތަށް ވަނީ ހަމަޖެހިފައެވެ.