ނައިންޓީ ޕްލަސް ގޯލްޑް ކަޕް 2024 ގެ ފައިނަލް މެޗު ބެލުމަށް މާލެ ދިއުމަށް އޭދަފުށި ސަޕޯޓަރުންނަށް ހުޅުވާލި ހިލޭ ޖާގަތައް ހުސްވުމާ ގުޅިގެން، އިތުރު ދަތުރުތައް ބާއްވައިދިނުމަށް ސަޕޯޓަރުން އެދެން ފަށައިފިއެވެ.

މާދަމާ ރޭ 9:00 ގައި ބޭއްވުމަށް ހަމަޖެހިފައިވާ ފައިނަލް މެޗުގައި އޭދަފުއްޓާއި އައްޑޫ ސިޓީ ވާދަކުރާނެއެވެ. މި މެޗު ބެލުމަށް އޭދަފުށި ސަޕޯޓަރުންނަށް މާލެ ދިއުމުގެ ފުރުސަތު ހުޅުވާލީ އިއްޔެ ރޭއެވެ.

Ad by Hajj Corporation

އޭދަފުށި ދާއިރާގެ މެމްބަރު އަހުމަދު ސަލީމް، އޭދަފުށި ކައުންސިލް އަދި ޔޫސުފް ސްޕީޑް ގްރޫޕުން ގުޅިގެން ސަޕޯޓަރުންނަށް ހިލޭ މާލެ ދިއުމުގެ ފުރުސަތު ހުޅުވާލިއެވެ. މިހާތަނަށް 6 ލޯންޗުގައި 330 ސަޕޯޓަރުންނަށް މާލެ ދިއުމުގެ ޖާގަ ލިބިފައިވާއިރު، އިތުރު އެތައް ބަޔަކު ވެއިޓިންގ ލިސްޓުގައި ތިބިކަން ފާހަގަކުރެވެއެވެ.

ފައިނަލް މެޗުގައި އޭދަފުށީ ސަޕޯޓަރުންނަށް ޚާއްޞަކޮށްފައިވަނީ މަޖީދީމަގު އޮލިމްޕަސް ފަޅިއެވެ. އަދި މެޗުގައި އޭދަފުށި ޓީމު ބޭނުންކުރާނީ ރަތް ޖާޒީއެވެ.

މި ކުޅިވަރު މުބާރާތުގެ ފައިނަލް މެޗަށް އޭދަފުށީ ސަޕޯޓަރުން ދައްކަމުންދާ ޝައުޤުވެރިކަމާއި ހިތްވަރުދިނުމުގެ ރޫހު ވަރަށް މަތިކަން ފާހަގަކުރެވެއެވެ. އިތުރު ދަތުރުތަކެއް އިންތިޒާމު ކުރެވޭތޯ ކަމާބެހޭ ފަރާތްތަކުން މަސައްކަތް ކުރަމުންދާކަން މި ޚަބަރު ތައްޔާރުކުރި ވަގުތު އެނގިފައިވެއެވެ.