ޖަރުމަނުގެ ކުރީގެ ފުޓްބޯޅަ ތަރި އަދި ޔޫއެފާ ޔޫރޯ 2024 ގެ ޑިރެކްޓަރު ފިލިޕް ލާމް އިން ސައޫދީ އަރަބިއްޔާއިން 2034 ވަނަ އަހަރުގެ ވޯލްޑް ކަޕް ބޭއްވުމާ މެދު ފާޑުކިޔައިފިއެވެ. އޭނާ ވަނީ މިފަދަ ބޮޑެތި އިވެންޓްތައް ބާއްވަންވާނީ ޑިމޮކްރެޓިކް ޤައުމުތަކުގައި ކަމަށް ބުނެފައެވެ. އަދި 2030 އަދި 2034 ވަނަ އަހަރުގެ ވޯލްޑް ކަޕްތަކަށް އެއްފަހަރާ ވޯޓުލީ ގޮތަށްވެސް ފާޑުކިޔާފައިވެއެވެ.

އޭނާ ވަނީ ސައޫދީ އަރަބިއްޔާގެ ކުޅިވަރު ހިންގުމުގައި ޑިމޮކްރެޓިކް އުސޫލުތައް ނެތްކަމާމެދުވެސް ސުވާލު އުފައްދާފައެވެ. މީގެ އިތުރުން، ފުޓްބޯޅައިގެ އިތުބާރު ގެއްލެމުންދާ ކަމަށާއި، ގިނަ ފޭނުން ދެކޭގޮތުގައި ނިންމުންތައް ނިންމަނީ އިންޓެގްރިޓީއަށްވުރެ ފައިސާއަށް ބަލައިގެން ކަމަށްވެސް އޭނާ ފާހަގަކޮށްފައިވެއެވެ.

Ad by Hajj Corporation

އޮސްޓްރޭލިއާއިން ބިޑިންގ ޕްރޮސެސްއިން ތަނާޒުލުވުމާއިގުޅިގެން ފީފާގެ ޤަވާއިދުތަކުގެ ތެރެއިން ސައޫދީ އަރަބިއްޔާ ވަނީ ހަމައެކަނި ކެންޑިޑޭޓަކަށްވެފައެވެ. މިކަމުގެ ސަބަބުން ސައޫދީ އަރަބިއްޔާގެ ބިޑް ވަނީ ފަސޭހަކަމާއެކު ކާމިޔާބުވެފައެވެ.

ލާމްގެ މި ޚިޔާލުތަކުގެ ސަބަބުން ވޯލްޑް ފުޓްބޯޅައިގެ މުސްތަޤްބަލާ މެދު ފުޅާ ދާއިރާއެއްގައި ބަހުސްތަކެއް ފެށިގެން ގޮސްފައިވެއެވެ. އަދި ގިނަ ބަޔަކު ވޯލްޑް ކަޕް ބާއްވާނެ ޤައުމުތައް ހޮވުމުގައި އަގުތަކާއި ހާމަކަން ހުންނަންވާ މިންވަރާމެދު ސުވާލު އުފައްދަމުންދެއެވެ.