ޤައުމީ އެއަރލައިން މޯލްޑިވިއަންގެ ފުރަތަމަ ވައިޑްބޮޑީ މަތިންދާބޯޓު ރާއްޖެ ގެނައުމަށް ކުރަންޖެހޭ ހުރިހާ މަސައްކަތެއްވެސް ކުރާނީ ގައުމީ އެއާލައިންގެ ޓެކްނިކަލް ދިވެހި މުވައްޒަފުންކަމަށް އައިލެންޑް އޭވިއޭޝަންގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ޢަލީ ސަލީމް ވިދާޅުވީ، މިބޯޓު ރާއްޖެ ގެނައުމަށް ޤައުމީ އެއަރލައިންގެ މުވައްޒަފުން ބުރަ މަސައްކަތްތަކެއް ކުރަމުން ގެންދާ ކަމަށެވެ. އަދި ބޯޓު ބެލުމަށް ލިތުއޭނިއާއަށް ދިޔުމާއި، ބޯޓުގެ އިންޖިނިއަރިންގ އާ ގުޅޭ ހުރިހާ ކަމެއްވެސް ކުރެއްވީ ގައުމީ އެއާލައިންގެ ޓެކްނިކަލް ބޭފުޅުންކަމަށް އޭނާ ފާހަގަކުރެއްވިއެވެ.

"މިހާރު އެކުރިއަށްދާ މަސައްކަތްތަކުގައިވެސް އަޅުގަނޑުމެންގެ ޓީމުތައް އެތަނުގައި ތިބެގެން އެމަސައްކަތް ކުރަނީ. އަޅުގަނޑު ފާހަގަކުރަން ބޭނުން އެއްވެސް ބޭރުބައެއްގެ އެކަހަލަ އެހީތެރިކަމެއް ނެތި، ހަމަ ދިވެހީންކަން މިކަން މިކުރަނީ." ސަލީމް ވިދާޅުވިއެވެ.

މި ވައިޑްބޮޑީ މަތިންދާބޯޓު އަންނަ އަހަރުގެ ޖެނުއަރީ މަހުގެ 6 ވަނަ ދުވަހު މާލެ ގެނައުމަށް މަސައްކަތްކުރަމުންދާކަމަށާއި، އެކަން ފާހަގަކުރުމަށް ޚާއްސަ ޙަރަކާތްތަކެއް އިންތިޒާމުކުރައްވާނެކަމަށްވެސް ޤައުމީ އެއަރލައިނުން ވިދާޅުވެފައިވެއެވެ.

ވައިޑްބޮޑީ އެއަރކްރާފްޓް ޚިދުމަތް އަންނަ އަހަރުގެ ކުރީކޮޅު ފެށުމަށްފަހު، އިތުރު މަތިންދާބޯޓެއް ގެނައުމުގެ މަސައްކަތްވެސް ކުރަމުންދާކަމަށް މޯލްޑިވިއަނުން ހާމަކުރައްވާފައިވެއެވެ.

މި މަސައްކަތަކީ ޤައުމީ އެއަރލައިންގެ ތަރައްޤީއަށާއި، ދިވެހި މުވައްޒަފުންގެ ޤާބިލުކަން އިތުރުކުރުމަށް އެޅޭ މުހިންމު ފިޔަވަޅެއްކަން ފާހަގަކުރެވެއެވެ.