ރާއްޖޭގައި މުދަލު ޒަކާތް ދައްކާ މީހުން މަދުވާ ސަބަބުތައް ހޯދުމަށް ޒަކާތް ހައުސްގެ ދިރާސާއެއް ފެށޭ އަހަރުގައި ހިންގޭނެ ކަމަށް ޑިރެކްޓަރ ޖެނެރަލް އޮފް ޒަކާތު ފަޟީލަތުއްޝައިޚް ޢިއްޒައްދީން ޢަދްނާން ވަނީ ވިދާޅުވެފައެވެ.

ޕީއެސްއެމްގެ ރާއްޖެ މިއަދު ޕްރޮގްރާމުގައި ޢިިއްޒުއްދީން ވިދާޅުވެފައި ވަނީ ރާއްޖޭގައި މުދަލު ޒަކާތް ދައްކާ ފަރަާތްތަކުގެ އަދަދު މަދުކަމަށެވެ. ޒަކާތު ފަންޑަށް މިއަހަރު 98 މިިލިއަން ރުފިޔާގެ ރިކޯޑް އަދަދެޢް ލިބިފައިވާއިރު އޭނާ ފާހަގަކޮށްފައިވަނީ، މުދަލު ޒަކާތް ދެއްކުން ހައްޤު ހުރިހާ ފަރާތްތަކެއް އެ ވާޖިބު އަދާކުރާނަމަ މި ފަންޑަށް އިތުރު އެހީ ލިބޭނެ ކަމަށެވެ.

ރާއްޖޭގައި މުދަލު ޒަކާތް ދައްކާ ފަރާތްތަކުގެ އަދަދު މަދުވާ މައިގަނޑު ސަބަބަކީ، ޒަކާތް ދެއްކުމުގެ މުހިންމުކަމާ މެދު މީހުންގެ ހޭލުންތެރި ކުޑަވުންކަމަށް ޢިއްޒުއްދީން ފާހަކުރިއެވެ. މި ގޮންޖެހުމާއި ކުރިމަތިލުމަށް ޒަކާތް ހައުސްއިން ދަނީ ހޭލުންތެރި ކުރުމުގެ ޕްރޮގްރާމްތަކާއި، އެހެނިހެން ހަރަކާތްތައްވެސް ކުރިއަށް ގެންދަމުންނެވެ.

ޒަކާތް ހައުސްގެ 2025 ވަނަ އަހަރުގެ މެންޑޭޓްގެ ދަށުން ކުރިއައް ގެންދަން ހަމަޖެހިފައިވާ ދިރާސާގެ މަޤްސަދަކީ، ރާއްޖޭގައި ޒަކާތް ދެއްކުން މަދުވާ ސަބަބުތަކާއި، ޒަކާތް ދެއްކުން ހައްޤު ނަމަވެސް އެ ވާޖިބް އަދާ ނުކުރާ މީހުން ދެނެގަތުމެވެ.

މި ގޮތުން ޢިިއްޒުއްދީން ވިދާޅުވެފައި ވަނީ، މުދަލު ޒަކާތް ދެއްކުމުން މުދާ އިތުރުވާކަމަށް ދިރާސާތަކުން ހާމަކުރާކަމެވެ.