މި އަހަރަކީ ބޯހިޔާވަހިކަމާއި އަދި ތަރައްގީގެ މަޝްރޫއުތައް ފެށޭނެ އަހަރުކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު އެފަދައިން ވިދާޅުވީ، މީލާދީ އައު އަހަރުގެ ތަހުނިޔާ ފޮނުއްވަމުން ރޭ "އެކްސް"ގައި ކުރެއްވި ޕޯސްޓެއްގައެވެ.

އެގޮތުން ރައީސް ވިދާޅުވީ، މި އަހަރު ވާނީ އިޤުތިޞާދީ މަސައްކަތްތައް ފުޅާކުރެވި، ފުދުންތެރިކަނަް އިތުރުކޮށް، މަސައްކަތްތެރީންނަށް އިތުރު ފުރުޞަތުތައް ހުޅުވޭނެ އަހަރަށް ކަމަށެވެ. އަދި މި އަހަރު ވާނީ އަމާންކަމާއި، ހަމަޖެހުމުގެ ބިންގަލުގެ މަތީ ތަރައްޤީ ހާސިލްކުރާނެ އަހަރަށް ކަމުގައި ރައީސް ވިދާޅުވިއެވެ.

ރައީސް އެފަދައިން ވިދާޅުވިއިރު، މި އަހަރަށް ލަފާކޮށް ދައުލަތުން ހުށަހެޅި، 56.6 ބިލިއަން ރުފިޔާގެ ބަޖެޓުވަނީ މަޖިލީހުން ފާސްކޮށްފައެވެ. މި ބަޖެޓަކީ ރާއްޖޭގެ ތާރީޚުގައި ވެސް، މިހާތަނަށް ފާސްކުރެވުނު ނިސްބަތުން އެންމެ ޑެފިސިޓް ކުޑަ ބަޖެޓެވެ. އަދި އެ ބަޖެޓަކީ މިހާތަނަށް، ބޯހިޔާވަހިކަމަށް ހޭދަކުރުމަށް އެންމެ ބޮޑު ބަޖެޓެއް އެކަށައަޅާފައިވާ ބަޖެޓު ވެސް މެއެވެ.

އެގޮތުން ބޯހިޔާވަހިކަމަށް ޚާއްސަކޮށް 3.8 ބިލިއަން ރުފިޔާ އެ ބަޖެޓުގައި ހިމަނާފައިވާއިރު، އުމްރާނީ ތަރައްގީގެ މަޝްރޫއުތައް ނުވަތަ ޕީއެސްއައިޕީ އަށް ކަނޑައަޅާފައިވާ ބަޖެޓުގެ 50 އިންސައްތަ ހޭދަކުރަނީ ވެސް ގެދޮރުވެރިކަމާއި ބޯހިޔާވަހިކަމުގެ މަޝްރޫއުތަކަށް ކަމުގައި ސަރުކާރުން މީގެ ކުރިން ހާމަކޮށްފައިވެއެވެ. އެގޮތުން ޕީއެސްއައިޕީ މަޝްރޫއުތަކަށް ޚާއްސަކޮށް، 12.4 ބިލިއަން ރުފިޔާ ބަޖެޓުގައި ވަނީ ހިމަނާފައެވެ.