އިންޑިއާއިން ރާއްޖޭގެ ވެރިކަން ބަދަލުކުރުމަށް ރޭވުންތަކެއް ރޭވިކަމަށް ބުނެ ވޮޝިންޓަން ޕޯސްޓުގައި ލިޔެފައިވާ ރިޕޯޓަކީ މުޅީން ދޮގު ރިޕޯޓެއް ކަމަށް ފޮރިން މިނިސްޓަރު އަބްދުﷲ ޚަލީލް ވިދާޅުވެއްޖެއެވެ.

ޚަލީލް މިހެން ވިދާޅުވެފައިވަނީ، އިންޑިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން އެ ޤައުމުގެ ވިއޯން ނޫހަށް ދެއްވި ޚާއްސަ އިންޓަވިއުއެއްގައެވެ.

އެ ރިޕޯޓާ ގުޅިގެން ޚަލީލު ވިދާޅުވީ އެއީ މުޅީން ދޮގު، އަދި އެ ތުހުމަތުތަކަކީ، އެއްވެސް ތެދެއް ނެތް ތުހުމަތުތަކެއް ކަމަށް އަމިއްލަފުޅަށް ގަބޫލުކުރައްވާ ކަމަށެވެ.

ފޮރިން މިނިސްޓަރު އިތުރަށް ވިދާޅުވި ގޮތުގައި، ރާއްޖެއާއި އިންޑިއާއާ ދެމެދު މިވަގުތު އޮތީ ވަރަށް ވަރުގަދަ ގުޅުމެކެވެ. އަދި އެ ގުޅުމަށް ބުރޫއަރާނެ އެއްވެސް ކަމަކަށް ސަރުކާރުން ޖާގައެއް ނުދޭނެ ކަމަށް ވެސް އޭނާ ވިދާޅުވިއެވެ. ނަމަވެސް، ރާއްޖެއާއި އިންޑިއާ ދެމެދު އޮތް ގުޅުމަށް ހީނަރުކަން ގެންނަން އަދިވެސް ބައެއް ފަރާތްތަކުން މަސައްކަތް ކުރާ ކަމަށް ޚަލީލް ފާހަގަކުރެއްވިއެވެ.

މީގެ އިތުރުން، ޚަލީލް ވިދާޅުވީ އެކި ގައުމުތަކާއެކު ބާއްވާ ގުޅުން ތަފާތު ކަމަށެވެ. އެގޮތުން ބައެއް ގައުމުތަކާއެކު ހަމައެކަނި އިގްތިޞާދީ ދާއިރާއިން ގުޅުން ބަދަހިކުރާއިރު، އަނެއްބައި ގައުމުތަކާއެކު އެހެން ދާއިރާތަކުން ވެސް ގުޅުން ބަދަހިކުރާ ކަމަށް އޭނާ ވިދާޅުވިއެވެ.