ރައްޔިތުންގެ މަޖިލީހުގެ ދައުރުން ބޭރުން ދެ ޖަލްސާއެއް ބާއްވަން ނިންމައިފިއެވެ.

އެގޮތުން މި މަހުގެ 16 ވާ ބުރާސްފަތި ދުވަހުގެ އިތުރުން މި މަހުގެ 20 ވަނަ ދުވަހު ޖަލްސާއެއް ބޭއްވުމަށް ވަނީ ނިންމާފައެވެ.

މަޖިލީހުގެ ޤަވާއިދު ބުނާ ގޮތުން މަޖިލީހުގެ ތިން ވަނަ ދައުރަކީ އޮކްޓޯބަރު 1 އިން ފެށިގެން ނޮވެމްބަރު ނިޔަލަށެވެ. ނަމަވެސް މަޖިލީހުގައި މަސައްކަތްތައް ހުރުމުން މަޖިލީހުގެ މިއަހަރުގެ ތިން ވަނަ ދައުރު ނިންމާލީ މިދިޔަ މަހުގެ 12 ވަނަ ދުވަހު އެވެ.

ޖަލްސާގެ އެޖެންޑާ އަދި މިހާތަނަށް އާއްމުކޮށްފައި ނުވިނަމަވެސް އެ ދުވަހުގެ މަސައްކަތްތަކުގެ ތެރޭގައި ހުސްވެފައިވާ އިލެކްޝަންސް ކޮމިޝަން (އީސީ) ގެ ދެ މެމްބަރުންގެ މަގާމަށް ބޭފުޅުން އައްޔަނުކުރުމަށް ވޯޓު ނެގުނުް އޮންނާނެ އެވެ.

އީސީގެ ދެ މެމްބަަރެއްގެ މަގާމު ހުސްވީ އަލީ ނަޝާތު އާއި މުހައްމަދު އާސިފް މަގާމުން ވަކިކުރަން މިިދޔަ ނޮވެމްބަރު މަހުގެ 25 ވަނަ ދުވަހު މަޖިލީހުން ފާސްކުރުމުންނެވެ.

އިލެކްޝަން ކޮމިޝަންގެ ޤާނޫނުގައި ބަޔާންކޮށްފައިވާ ގޮތުން އީސީގެ މެންބަރުކަމުގެ މަގާމު ހުސްވާތާ 60 ދުވަހުގެ ތެރޭގައި އެ މަގާމަށް މެންބަރަކު އައްޔަންކުރަން ޖެހޭނެ އެވެ.

މަޖިލީހުގެ ދައުރު ދެން ފެށޭނީ ފެބްރުއަރީ 1 ވަނަ ދުވަހުއެވެ.