އިނގިރޭސި ލީގުކަޕްގެ ސެމީފައިނަލުގެ ފުރަތަމަ ލެގުގައި ޓޮޓްނަމް ލިވަރޕޫލުގެ މައްޗަށް ކުރިހޯދައިފިއެވެ. ޓޮޓްނަމްގެ އަމިއްލަ ދަނޑުގައި ކުޅެވުނު މިމެޗު ނިމުނީ 1-0 އިން ޓޮޓްނަމް މޮޅުވެގެންނެވެ.

Ad by Hajj Corporation

ފޯރިގަދަ ކުޅުމެއް ފެނުނު މިމެޗުގައި ދެޓީމުންވެސް ވަނީ ގޯލަށް އަމާޒުކޮށް ގިނަ ހަމަލާތަކެއް ފޮނުވާލާފައެވެ. މެޗުގެ 76 ވަނަ މިނެޓުގައި ޓޮޓްނަމްގެ ޑޮމިނިކް ސޮލަންކޭ ޖެހި ގޯލުވަނީ ވީ.އޭ.އާރު ބަލައި އޮފްސައިޑްކަމަށް ނިންމާފައެވެ. މިމެޗުގެ ޓޮޓްނަމްގެ ހަމައެކަނި ގޯލުޖަހާފައިފަވީ މެޗުގެ 86 ވަނަ މިނެޓުގައި ސްވިޑަންގެ ޓީނޭޖު ކުޅުންތެރިޔާ ލޫކަސް ބަރެވާލް އެވެ. މިއީ މިދިޔަ ޖުލައިގައި ޓޮޓްނަމް އަށް ބަދަލުވި މިކުޅުންތެރިޔާ ކުލަބަށް ޖަހައިދިން ފުރަތަމަ ގޯލެވެ.

ރޭގެމެޗުގައި ލިވަރޕޫލުގެ ފަރާތުން ވަނީ ޖުމްލަ 7 ސޮޓް ގޯލާ އަމާޒުކޮށް ފޮނުވާލާފައެވެ. މިހުރިހާ ސޮޓެއް ދިފާއުކުރުމުގެ މޭސްތިރިޔަކީ ޓޮޓްނަމްގެ ގޯލްކީޕަރު ކިންސްކީއެވެ.

ރޭގެ މޮޅާއެކު ސެމީފައިނަލުގެ ކޮންޓްރޯލް ޓޮޓްނަމް އިން ވަނީ ނަގާފައެވެ. ލިވަރޕޫލުގެ އެންފީލްޑް ގައި ކުޅެން ހަމަޖެހިފައިވާ ސެމީގެ ދެވަނަ ލެގު ކުޅެން ހަމަޖެހިފައިވަނީ ފެބްރުއަރީ 7 ވަނަ ދުވަހުގައެވެ.

މިމުބާރާތުގެ ސެމީފައިނަލުގެ އަނެއްކޮޅުން ބައްދަލުކުރާ އާރސެނަލް އާއި ނިއުކާސަލް މެޗުގައި، ނިއުކާސަލް ވަނީ މޮޅުވެފައެވެ. މިމުބާރާތުގެ މިދިޔަ އަހަރުގެ ޗެންޕިއަންޓީމަކީ ލިވަރޕޫލެވެ.