އެމެރިކާގެ ކެލިފޯނިޔާގައި ރޯވެފައިވާ އަލިފާންގަނޑުގެ ސަބަބުން ބޮޑެތި ގެއްލުންތަކެއް ލިބެމުންދާ ދަނޑިވަޅެއްގައި އެ އަލިފާނުގެ ސަބަބުން ލިބެމުންދާ ގެއްލުންތަކަކީ ޔަހޫދީ އިސްރާއީލާ ހެދި ލިބެމުން އަންނަ ގެއްލުންތަކެއްކަމަށް ބައެއް ފަރާތްތަކުން ބުނެފިއެވެ.

ޔަހޫދީން ފަލަސްތީނުގެ ރައްޔިތުންގެ ނަސްލުނައްތާލުމުގެ ޖަރީމާއެއް ހިންގަމުން އަންނައިރު އެކަމަށް އެމެރިކާއިން އަންނަނީ މަދަދު ފޯރުކޮށްދެމުންނެވެ. އެގޮތުން މާލީ ގޮތުންނާއި އަސްކަރީ ޒަމާނީ ހަތިޔާރު ޔަހޫދީންނަށް ފޯރުކޮށްދެނީ އެމެރިކާއިންނެވެ.

Ad by Hajj Corporation

ޔަހޫދީންނަށް ވާގިވެރިވެ އެމެރިކާގެ ފައިސާ އިސްރާފުކުރުމާ ދެކޮޅަށް އަޑުއުފުލާ ފަރާތްތަކުން ބުނެފައިވަނީ ކުޑައެއް ބޮޑެއް ބެލުމެއް ނެތި ޣައްޒާގައި ތިބި މީހުން ދިރިތިއްބާ އަންދާލުމަށް އެމެރިކާއިން ޔަހުދީންނަށް ފައިސާ ދެމުންދާއިރު އެފަދަ ކާރިސާއެއްގެ ރަހަ އެމެރިކާ މީހުންނަށް ލިބިގެންދިއުމަކީ ހައިރާންވާންޖެހޭ ކަމެއް ނޫންކަމަށެވެ. އަދި އެމެރިކާގެ ރަށްވެހިންނަށް ހަމަޖެހިގެން އުޅުމަށް ހަރަދުކުރުމުގެ ބަދަލުގައި އެމެެރިކާ ސަރުކާރުންދަނީ ޣައްޒާގެ ނަސްލު ނައްތާލަން ކުރަމުންދާ މަސައްކަތްތަކަށް ބިލިއަނުން ހޭދަކުރަމުންކަމަށް އެމީހުން ބުނެއެވެ.

ކެލިފޯނިޔާގައި ރޯވެފައިވާ އަލިފާންގަނޑުގެ ސަބަބުން 9000 އަށް ވުރެ ގިނަ ގެ އަނދާފައިވާކަމަށާއި އަދި 5 މީހަކު މަރުވެފައިވާކަމަށް އެމެރިކާގެ ފުލުހުން ލަފާކުރެއެވެ. އަލިފާނުގެ ސަބަބުން ލައްކައަކަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.

އެމެރިކާގެ ލޮސް އެންޖެލެސްގެ ޖަންގަލިތަކުގައި ރޯވެ މީހުން ދިރިއުޅޭ ސަރަހައްދުތަކުގައި ފެތުރެމުން ތަފާތު 3 އަލިފާންގަނޑުގެ ސަބަބުން ބޮޑެތި ދަތިތަކާ ވަނީ ކުރިމަތިވެފައެވެ.