ސްޕެނިޝް ސުޕަރކަޕް ފައިނަލުގެ ޖާގައެއް ބާސެލޯނާގެ ފަހަތުން ރެއާލް މެޑްރިޑް ކަށަވަރުކޮށްފިއެވެ. ސަޢޫދީގެ ރިޔާދުގައި ރޭގައި ރެއާލް މަޔޯކާއާއި ދެކޮޅަށް ކުޅުނުމެޗު ރެއާޅް މެޑްރިޑުން ކާމިޔާބުކުރީ 3-0 އިންނެވެ.

މެޗުފަށައިގެން މުޅިމެޗު ކޮންޓްރޯލް ކޮށްގެން ކުޅުނީ ރެއާލް މެޑްރިޑުންނެވެ. މެޑްރިޑްގެ ފުރަތަމަ ގޯލުޖެހީ 2 ވަނަ ހާފުގެ 63 ވަނަ މިނެޓުގައި ބެލިންގްހަމް އެވެ. މިއީ މި ސީޒަންގައި އޭނާ ޖެހި 9 ވަނަ ގޯލެވެ. މެޑްރިޑުގެ 2 ވަނަ ގޯލަކީ ބްރަހީމް ޑިއާޒް ދިން ތްރޫ ޕާހެއް މަޔޯކާގެ ޑިފެންޑަރ ވޭލްޖެންޓް ފައިގައި ޖެހިފައި ވަތް ގޯލެކެވެ. މެޑްރިޑްގެ ފަހުގޯލު ކާމިޔާބުކޮށްދިނީ މެޗުގެ ފަހު ސިކުންތުކޮޅުގައި ރޮޑްރީގޯއެވެ.

މިއާއެކު މި މުބާރާތުގެ މިދިޔަ އަހަރުގެ ފައިނަލުގައި ކުޅުނު ބާސެލޯނާ އާއި ރެއާލް މެޑްރިޑްގެ އެލްކްލެސިކޯ ފައިނަލެއް އަނެއްކާވެސް މިވަނީ ތަކުރާރުވެފައެވެ. މިދިޔަ އަހަރުގެ ފައިނަލުގައި ރެއާލް މެޑްރިޑު ވަނީ ބާސެލޯނާ 4-1 އިން ބަލިކޮށްފައެވެ. އަދި އެމެޗުގައި ވިނީޝިއުސް ވަނީ ހެޓްރިކް ހަދާފައެވެ.

މިއީ މިސީޒަނުގެ ދެވަނަ އެލް ކްލެސިކޯއެވެ. މީގެ ކުރިން މިދެޓީމު ރެއާލް ގެ ދަނޑުގައި ކުޅެވުނު މެޗު ބާސެލޯނާއިން ވަނީ ފަސޭހަކަމާއެކު 4-0 އިން ކާމިޔާބުކޮށްފައެވެ.

މިމެޗަކީ ހުރިހާގޮތަކުންވެސް ފޯރިގަދަ މެޗަކަށް ވާނެކަމަށް ބެލެވެއެވެ. މިމެޗު ކުޅެން ހަމަޖެހިފައިވަނީ އަންނަ އާދިއްތަދުވަހު ރޭގަނޑު ރާއްޖެގަޑިން 12:00 ގައެވެ. މެޗުކުޅެނީ ސަޢޫދީގެ ކިންގް އަބްދުﷲ ސިޓީ ސްޓޭޑިއަމްގައެވެ.