ނާޕޯލީގެ ޖޯޖިއަން ފޯވާޑް ކްވީޗާ ކަވަރަޓްސްކެލިއާ ޕެރިސް ސެއިންޓް-ޖަރމޭން (ޕީ.އެސް.ޖީ) އަށް ބަދަލުވުމުގެ މަސައްކަތް ނިމިފައިވާކަމަށް ނޫސްތަކުން ރިޕޯރޓްކުރަން ފަށައިފިއެވެ. އެގޮތުން މި ކުޅުންތެރިޔާގެ ޓްރާންފަރ ގެ އެންމެހައި ކަންކަން އަންނަ ހަފްތާގައި ނިމޭނެކަމަށް މަސްދަރުތަކުން ހާމަކުރެއެވެ.

23 އަހަރުގެ ކްވަރަޓްސްކެލިއާ މި ސީޡަނުގައި އެހާ ރަނގަޅު ފޯމެއްގައި ނެތް ނަމަވެސް، އޭނާ ދޫކޮށްލުމަށް ނާޕޯލީން ނިންމާފައިވާ ކަމަށް ބެލެވެއެވެ. 2022 ވަނަ އަހަރު އެންމެ 12 މިލިއަން ޔޫރޯއަށް ނަޕޮލީއަށް ސޮއިކުރި ކަވަރަޓްސްކެލިއާގެ ޓްރާންސްފަރ އަގު 75 މިލިއަން ޔޫރޯއަށް އަރާނެކަމަށް ބެލެވެއެވެ.

މި މުޢާމަލާތުގެ ތެރޭގައި ޕީއެސްޖީގެ ސްލޮވޭކިއަން ޑިފެންޑަރ މިލާން ސްކްރިނިއާ ނާޕޯލީއަށް ބަދަލުވުމުގެ ފުރުސަތު އޮތް ކަމަށް ވެސް ބުނެވެއެވެ. އިޓަލީއަށް އެނބުރި ދިއުމަށް ބޭނުންވާ ސްކްރިނިއާ ނާޕޯލީއާ ގުޅުމުގެ ވާހަކަ ކުރިން ވެސް ދެކެވިފައިވެއެވެ.

ކަވަރަޓްސްކެލިއާ ދޫކޮށްލުމުން އެންޓޯނިއޯ ކޮންޓޭގެ ޓީމުގެ ފޯވަޑް ލައިން ބަލިކަށިވާނެ ކަމަށް ބެލެވެއެވެ. އެގޮތުން މިދިޔަ ޓްރާންފަރ މާކެޓްގައި ލޯނު އެއްބަސްވުމެއްގެ ދަށުން ނަޕޮލީގެ އެންމެ މުހިންމު އެއް ކުޅުންތެރިޔާ ވިކްޓޯ އޮސިމެން ވަނީ ތުރުކިޔޭގެ ގަލަޓަސަރާއީ އަށް ބަދަލުވެފައެވެ.  އެހެންކަމުން މިކަން ފޫބެއްދުމަށް ބޯންމަތުގެ ފިލިޕް ބިލިންގ ލޯނު އެއްބަސްވުމެއްގެ ދަށުން ގެނައުމަށް ނިންމާފައިވާކަމަށް ރިޕޯރޓްތައް ބުނެއެވެ.