މާލޭގެ މާފަންނު ސަހަރާގައި ހުންނަ ފެން ހިންދާ ޕަމްޕަށް ގެއްލުންދިނީ ސިޓީ ކައުންސިލުން ކަމަށް އުމްރާނީ ތަރައްގީއާ ބެހޭ ވަޒީރު ޑރ. އަބްދުﷲ މުއްތަލިބު ވިދާޅުވުމުން، މާލޭގެ މޭޔަރު އާދަމް އާޒިމް އެކަމަށް ރައްދު ދެއްވައިފިއެވެ.

ވަޒީރު މުއްތަލިބްއަށް މޭޔަރު އާޒިމް ރައްދުދެއްވީ، ހަލާކުވެފައި އޮތް އެ ޕަމްޕުގެ ފޮޓޯއަކާއެކު މިއަދު މެންދުރު، ވަޒީރު މުއްތަލިބު "އެކްސް"ގައި ކުރެެއްވި ޕޯސްޓެއްގައި، އެ ޕަމްޕު ހަލާކުރީ ސިޓީ ކައުންސިލުން ކަމަށް ވިދާޅުވުމާ ގުޅިގެންނެވެ.

އެގޮތުން ވަޒީރުގެ ޕޯސްޓުގައި ވިދާޅުވީ، މާފަންނު ސަހަރާ ކޮނުމުގައި ސިޓީ ކައުންސިލުން ހަރަކާތްތެރިވެފައިވަނީ ވަރަށް ޒިންމާދާރުކަން ކުޑަ ގޮތެއްގައި ކަމަށާއި، ސިޓީ ކައުންސިލުގެ ސަބަބުން މާލޭގެ މާފަންނު ހުޅަނގުގައި ފެން ހިންދުމަށް ބޭނުންކުރާ ޕަމްޕު ހަލާކުވެފައިވާ ކަމަށެވެ. އަދި އެކަންކޮށްފައިވަނީ އެ ވުޒާރާގެ ހުއްދަ ނެތި ކަމަށާއި، އެކަމުގެ ސަބަބުން މުޅި އެ ސަރަޙައްދުގައި ވަރަށް ބޮޑަށް ފެންބޮޑުވެފައިވާ ކަމުގައި ވަޒީރު މުއްތަލިބް ވިދާޅުވިއެވެ.

އަދި އެ ޕަމްޕް ސްޓޭޝަން ބޭނުންކުރެވޭނެ ގޮތެއް ހޯދުމުގެ މަސައްކަތް އެ ވުޒާރާއިން ކުރަމުންދާ ކަމުގައި ވެސް އެ ޕޯސްޓުގައި ވަޒީރު ވިދާޅުވެފައިވެއެވެ.

ވަޒީރުގެ އެ ޕޯސްޓު، ރީ-ޕޯސްޓު ކުރައްވަމުން މޭޔަރު އާދަމް އާޒިމް ވިދާޅުވި ގޮތުގައި، މާފަންނު ސަހަރާގައި ހުރި ޕަމްޕު ހަލާކުވެގެން އެކަމުގެ ކަންބޮޑުވުން ކައުންސިލުގެ ފަރާތުން މީގެ ކުރިން އުމްރާނީ ތަރައްގީއާ ބެހޭ ވުޒާރާއަށް ވަނީ ހުށަހަޅާފައެވެ.

އެގޮތުން މޭޔަރު ވިދާޅުވީ، އެ ޕަމްޕުގެ ކަރަންޓު އިކުއިޕްމެންޓުތައް ހަލާކުވުމުގެ ސަބަބުން، އެ ޕަމްޕުތައް ބޭނުންނުކުރެވި، ހަލާކުވެފައި ހުންނަތާ ފަސް މަސް ވެއްޖެ ކަމަށެވެ. އަދި އެކަމާ ގުޅިގެން ކައުންސިލުގެ ފަރާތުން ވުޒާރާ އާ މަޝްވަރާކުރެވިފައިވާއިރު، އެ ޕަމްޕުތައް ހެދޭނެ ގޮތްތަކެއް ހޯދުމަށް ވެސް ކައުންސިލުގެ ފަރާތުން އެ ވުޒާރާގައި އެދިފައިވާކަން ވެސް މޭޔަރު ފާހަގަކުރެއްވިއެވެ.

އެގޮތުން އެ ވުޒާރާއަށް ސިޓީ ކައުންސިލުގެ ފަރާތުން ފޮނުއްވި ދެ ސިޓީއެއްގެ ފޮޓޯ ވެސް މޭޔަރު ވަނީ އެ ޕޯސްޓުގައި ހިމަނުއްވާފައެވެ. އޭގެ ތެރެއިން މިދިޔަ ޑިސެމްބަރު މަހުގެ 24 ވަނަ ދުވަހު ސިޓީ ކައުންސިލުގެ ފަރާތުން ވުޒާރާއަށް ހުށަހެޅުއްވި ސިޓީގައި ފާހަގަކޮށްފައިވާ ގޮތުގައި، އެ ޕަމްޕު މެއިންޓެއިންކޮށް ބެލެހެއްޓުމުގެ މަސައްކަތް ކުރިން އެމްޑަބްލިއުއެސްސީން ކުރަމުންދިޔަ ނަމަވެސް، އެ މަސައްކަތްކުރުމަށް އެކުންފުންޏާއެކު އެ ވުޒާރާއިން ހެދި އެއްބަސްވުމުގެ މުއްދަތު ވަނީ ހަމަވެފައެވެ.

އެހެންކަމުން އެ ޕަމްޕް ސްޓޭޝަން ބަލަހައްޓައިދޭނެ ފަރާތެއް ހޯދައި، ބަލަހައްޓާނެ ގޮތެއް ހޯދުމަށް ކައުންސިލާއި އެ ވުޒާރާ އެކުގައި ބައްދަލުވުމެއް ބޭއްވުމަށް ވެސް އެ ސިޓީގައި އެދިފައިވެއެވެ.

އަދި އޭގެ ފަހުން، މި މަހުގެ 8 ވަނަ ދުވަހު ވެސް ސިޓީ ކައުންސިލުން އެ ވުޒާރާއަށް ސިޓީއެއް ފޮނުވާފައިވާއިރު އެ ސިޓީގައި ވެސް، އެ ޕަމްޕު ބެލެހެއްޓުމުގެ މަސައްކަތް އެ ވުޒާރާއިން ކުރާތީވެ، އެކަމުގެ މައުލޫމާތު ހޯދުމަށް ކައުންސިލުން އެދިފައިވެއެވެ.

އެގޮތުން އެ ޕަމްޕު ސްޓޭޝަންތައް މެއިންޓެއިންކޮށް ބަލަހައްޓަން އެ ވުޒާރާއިން ހަމަޖައްސާފައި އޮތް ޝެޑިއުލުގެ އިތުރުން، މެއިންޓެނެންސް ކުރެވޭ މަސައްކަތްތައް އަންގައިދޭ ރިޕޯޓެއް ކޮންމެ މަހެއްގައި ފޮނުވުމަށް ވެސް ކައުންސިލުން އެ ސިޓީގައި އެދިފައިވެއެވެ.

އެ ދެ ސިޓީ ވެސް ވަޒީރު މުއްތަލިބަށް އެޑްރެސްކޮށްފައިވާއިރު، އެ ސިޓީތަކުގައި ކައުންސިލުގެ ފަރާތުން ސޮއިކުރައްވާފައިވަނީ ވެސް މޭޔަރު އާދަމް އާޒިމްއެވެ.

ވަޒީރު އެފަދައިން ވިދާޅުވެފައިވަނީ، މި ފަހުން މާލެއަށް ވެހުނު ވާރޭގައި މާލޭގެ މާފަންނު ހުޅަނގު ވަރަށް ބޮޑަށް ފެންބޮޑުވެ، އެ ސަރަހައްދުގައި ހުރި ގެތަކާއި ފިހާރަތަކަށް ވަރަށް ބޮޑަށް ގެއްލުންވުމާ ގުޅިގެން އާންމުންގެ ކަންބޮޑުވުން ބޮޑުވެފައިވާ ދަނޑިވަޅެއްގައެވެ. އެގޮތުން އެ ސަރަހައްދުގެ ފެން ހިންދަން ގިނަ ވަގުތު ނެގިއިރު، އެ ފެންގަނޑު ހިންދާފައިވަނީ ސިފައިންނާއި އިދާރާތައް ގުޅިގެން ކުރި މަސައްކަތުންނެވެ.