ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އެސްޓޯނިއާއަށް ކުރައްވާ ދަތުރުފުޅުގެ ތެރެއިން ރާއްޖޭގެ ޑިޖިޓަލް ޓެކްނޮލޮޖީ މިހާރު އޮތް ހާލަތުން އިތުރު ހަރުފަތަކަށް ގެންދިއުމަށް އެހީތެރިކަން ލިބިގެންދާނެކަމަށް ދާޚިލީ ސަލާމަތާއި ފަންނިއްޔަތާއި ބެހޭ ވުޒާރާގެ ސްޓޭޓް މިނިސްޓަރ ޑރ. މުޙައްމަދު ކިނާނަތު ވިދާޅުވެއްޖެއެވެ. ޑރ. ކިނާނަތު މިހެން ވިދާޅުވީ، ދައުލަތުގެ މީޑިއާގެ ޕްރޮގްރާމްގައި ވާހަކަދައްކަވަމުންނެވެ.

މި ދަތުރުފުޅުގައި ދިވެހިރާއްޖޭގެ ރައީސުލްޖުމްހޫރިއްޔާ އެގައުމުގެ ރައީސް އާއި ބައްދަލުކުރުމުގެ އިތުރުން އެގައުމުގެ މަޖިލިސް ރައީސް އާއި ބައްދަލުކުރައްވާނެއެވެ. މީގެ އިތުރުން ވެސް އެގައުމުގެ ބައެއް މިނިސްޓަރުންނާ ވެސް ބައްދަލުކުރައްވާނެއެވެ. މި ދަތުރުފުޅަކީ މި މަހުގެ 13 އިން 16 އަށް ކުރައްވާ ދަތުރުފުޅެކެވެ. މިއީ ދިވެހިރާއްޖޭގެ ރައީސަކު އެސްޓޯނިއާއަށް ރަސްމީ ދަތުރުފުޅެއް ކުރައްވާ ފުރަތަމަ ފަހަރެވެ.

މި ދަތުރުފުޅާއި ގުޅޭގޮތުން ރާއްޖެމިއަދު ޕްރޮގްރާމްގައި ވާހަކަފުޅުދައްކަވަމުން ދާޚިލީ ސަލާމަތާއި ފަންނިއްޔަތާއި ބެހޭ ވުޒާރާގެ ސްޓޭޓް މިނިސްޓަރ ޑރ. މުޙައްމަދު ކިނާނަތު ވިދާޅުވީ، އެސްޓޯނިއާއަކީ ޑިޖިޓަލް ޓެކްނޮލޮޖީގެ ދާއިރާއިން ދުނިޔޭގައި ކުރިއަރާފައިވާ ފާހަގަކޮށްލެވޭ ޤައުމެއްކަމަށެވެ. އެހެންކަމުން ރައީސްގެ ދަތުރުފުޅުގެ ތެރެއިން ރާއްޖޭގެ ޓެކްނޮލޮޖީ ކުރިއެރުވުމަށް ވަރަށް ބޮޑު އެހީތެރިކަމެއް ލިބިގެންދާނެކަމަށާއި، މި ދަތުރުފުޅުގެ ތެރެއިން އެސްޓޯނިއާއިން އެޤައުމުގެ ޓެކްނޮލޮޖީ ކުރިއަރުވަން ކުރި މަސައްކަތާއި ތަޖުރިބާތަކާއި، ގާތުން ބަލާލުމުގެ ފުރުޞަތު ލިބި ރާއްޖެއަށް އެކަމުން ފައިދާތަކެއް ކުރާނެކަމަށް ޑރ. ކިނާނަތު ފާހަގަކުރެއްވިއެވެ.

" ޑރ. މުހައްމަދު މުއިއްޒު އެސްޓޯނިއާއަށް ކުރައްވާ މި ދަތުރުފުޅު މި މަހު 16-13 އަަށް މިއޮތީ. ދެން އަޅުގަނޑު ގަބޫލުކުރާ ގޮތުގައި މި ދަތުރުފުޅުގެ މައިގަނޑު މަގްސަދަކީ ދެ ގައުމުގެ ދެމެދުގަ އޮތް ގުޅުން ބަދަހިކުރުން. އަދި އޭގެއިތުރުން ޑިޖިޓަލް ދާއިރާ، ސައިބަރ އަދި އީގައުންސް ދާއިރާއިން އަދި މޫސުމާ ތިމާވެއްޓާ ގުޅުންހުރި މައްސަލަތަކާއި ބެހޭގޮތުން ދެ ގައުމުގެ ދެމެދުގަ މަޝްވަރާކުރުން. ދެން އަޅުގަނޑު ދެކޭގޮތުން ދިވެހިރާއްޖޭގެ ރައީސަކު އެންމެ ފުރަތަމަ އެސްޓޯނިއާ އަށް ކުރައްވާ ދަތުރުފުޅު. މި ދަތުރުފުޅު ވެގެންދާނީ ވަރަށް ތާރީހީ ދަތުރުފުޅަކަށް."

އެގައުމުގައި ބާއްވާ ބައްދަލުވުންތަކާއި މަޝްވަރާތަކުގައި ބޮޑަށް އަލިއަޅުވާލާނީ އެސްޓޯނިއާއިން ހޯދާފައިވާ އިނޮވޭޝަންތަކާއި ޓެކްނޮލޮޖީގެ ކުރިއެރުންތަކުގެ މައްޗަށެވެ. އަދި އެސްޓޯނިއާގެ ރައީސް އަށް ޑިޖިޓަލް އެޑްވައިޒަރީ ކައުންސިލުން އިންތިޒާމްކުރާ ވަށާ މޭޒުގައި ވެސް ރައީސް ބައިވެރިވެވަޑައިގަންނަވާނެ ކަމަށާއި އެ ބުރު މޭޒުގައި ދެގައުމުގެ ދެމެދުގައި އިތުރު އެއްބާރުލުން ހޯދުމަށް މަގުފަހިވާނެ ކަމަށެވެ.

ރައީސްގެ އެސްޓޯނިއާގެ ދަތުރުފުޅުގައި އެއް ޤައުމުން އަނެއް ޤައުމަށް އިތުރަށް އެއްބާރުލުން ދިނުމާއި، ޑިޖިޓަލް، ސައިބަރ އަދި އީ-ގަވަނަންސް، މޫސުމީ ބަދަލު، ތިމާވެށީގެ މައްސަލަތައް އަދި ސައިންސާއި ތަޢުލީމީ ދާއިރާގައި އެކުގައި ކުރެވިދާނެ މަސައްކަތްތަކުގެ މައްޗަށް މަޝްވަރާކުރުމަށް ވަނީ ހަމަޖެހިފައެވެ.

ދަތުރުފުޅުގައި މަޝްވަރާތައް ކުރައްވާނީ، އީޖާދީ އުފެއްދުންތެރިކަމާއި އަދި ފަންނިއްޔާތުގެ ދާއިރާގައި އެސްޓޯނިއާއިން ހޯދާފައިވާ ކުރިއެރުންތަކުގެ މައްޗަށެވެ. އެސްޓޯނިއާގެ ރައީސަށް ލަފާއަރުވާ ޑިޖިޓަލް އެޑްވައިޒަރީ ކައުންސިލުން އިންތިޒާމުކުރާ ރައުންޑް ޓޭބަލް ބައްދަލުވުމެއްގައިވެސް ރައީސުލްޖުމްހޫރިއްޔާ ބައިވެރިވެވަޑައިގަންނަވާނެއެވެ. މި ހަރަކާތްތަކުގެ ތެރެއިން، އެއް ޤައުމުން އަނެއް ޤައުމަށް އެއްބާރުލުންދެވިދާނޭ ގޮތްތައް ނިންމުމަށް މަގުފަހިވެގެންދާނެއެވެ.

އެސްޓޯނިއާއިން ޑިޖިޓަލް ޓްރާންސްފޯމޭޝަނަށް ކުރި ދަތުރަކީ، މުޅި ދުނިޔޭގެ ތައުރީފް ލިބިފައިވާ މަސައްކަތެކެވެ. އަދި އެ ޤައުމަކީ، ޢާންމު ޚިދުމަތްތައް ޑިޖިޓަލައިޒްކުރުމުގައި ދުނިޔޭގައި އެންމެ މަތީ ފަންތީގައި ގުނާލެވޭ ޤައުމެކެވެ. ޑިޖިޓަލް ގަވަނަންސް އާއި، އީ-ސަރވިސް ގެ ދާއިރާގައި ދުނިޔޭގެ ލީޑަރެއްކަމުގައި ބެލެވިފައިވާ އެސްޓޯނިއާ މަޝްހޫރުވެފައިވަނީ އެ ޤައުމުން ތަޢާރަފުކުރި އީ-ރެޒިޑެންސީ ޕްރޮގްރާމާއި، އީ-ގަވަނަންސް މަންސަތަކާއި، ޢާންމު ޚިދުމަތްތައް ފޯރުކޮށްދިނުމުގައި ބުގިސްކަމާއެކު ޑިޖިޓަލް ޙައްލުތައް ހޯދައިދީފައިވާ ގޮތުގެ ސަބަބުންނެވެ.

ޑިޖިޓަލް ޓްރާންސްފޯމޭޝަނަކީ، ރައީސް އިސްކަންދެއްވާ ކަމެކެވެ. ޑިޖިޓަލް އިޤްތިޞާދެއް ޤާއިމުކުރައްވައި، 2030 ވަނަ އަހަރު އަންނަންވާއިރަށް، ރާއްޖޭގެ އުފެއްދުންތެރިކަމުގެ ނިސްބަތުގެ 30 އިންސައްތަ ހިއްސާކުރަނީ، ޑިޖިޓަލް އިޤްތިޞާދަކުން ކަމަށް ހެދުމަކީ އެމަނިކުފާނުގެ ވަޢުދުފުޅެކެވެ. މިއީ 2040 ވަނަ އަހަރު އަންނަ އިރު ދިވެހިރާއްޖެއަކީ ތަރައްޤީވެފައިވާ ޤައުމަކަށް ހެއްދެވުމަށް އެމަނިކުފާނު ގެންގުޅުއްވާ ތަޞައްވަރުގެ މުހިންމު ބަހާއެކެވެ. ސަރުކާރުން މި ވަގުތު ދަނީ، ޑިޖިޓަލް ޓްރާންސްފޯމޭޝަން ރޯޑްމެޕް ސްޓްރެޓަޖީ އެކުލަވާލުމުގެ މަސައްކަތްކުރައްވަމުންނެވެ. އަދި ޔުނެސްކޯގެ އޭ.އައި ރެޑިނަސް ޓޫލްސް ބޭނުންކޮށްގެން، އޭ.އައި ރެޑިނަސް އެސެސްމަންޓެއް ހަދައި، ޤައުމީ އޭ.އައި. މާސްޓަރޕްލޭނެއް އެކުލަވާމުގެ މަސައްކަތްވެސް، ސަރުކާރުން ދަނީ ކުރައްވަމުންނެވެ.

މި ދަތުރުފުޅުގައި، ރައީސުލްޖުމްހޫރިއްޔާގެ އަރިހުގައި، ޚާރިޖީ ވަޒީރު ޑޮކްޓަރ ޢަބްދުﷲ ޚަލީލާއި، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ ޢިހުސާނުގެ އިތުރުން ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ. އަދި ރާއްޖޭގެ ފަންނިއްޔާތުގެ ދާއިރާގެ މާހިރުންގެ މައްޗަށް އެކުލެވިގެންވާ ވަފުދެއްވެސް މި ދަތުރުފުޅުގައި، ރައީސުލްޖުމްހޫރިއްޔާގެ އަރިހުގައި އެސްޓޯނިއާއަށް ވަޑައިގެން، އެ ޤައުމުގެ ޑިޖިޓަލް ދާއިރާގެ ކުންފުނިތަކާއި މުވައްސަސާތަކާއެކު މަސައްކަތްތަކެއް ކުރެއްވުމަށް ހަމަޖެހިފައިވެއެވެ.