މިދިޔަ އަހަރު ދައުލަތަށް ލިބުނު ޑޮލަރު އާމްދަނީ އެއް ބިލިއަން ޑޮލަރަށްވުރެ މައްޗަށް އަރައިފި އެވެ.

މޯލްޑިވްސް އިންލަންޑް ރެވެނިއު އޮތޯރިޓީގެ ފާއިތުވި 2024 ވަނަ އަހަރުގެ ތަފާސް ހިސާބުތަކަށް ބަލާއިރު ޑޮލަރުން ލިބުނު އާމްދަނީ ވަނީ 2023 ވަނަ އަހަރާ އަޅާ ބަލާއިރު 12.5 އިންސައްތަ އިތުުރުވެފައެވެ.

ދައުލަތަށް މިދިޔަ އަހަރު ލިބުނު ޑޮލަރު އާމްދަނީގެ ތެރެއިން 619.9 މިލިއަން ޑޮލަރު ލިބިފައިވަނީ ޖީއެސްޓީގެ ދާއިރާއިންނެވެ.

ޑޮލަރު އާމްދަނީ ރާއްޖެ އިތުރުވާ މައިގަނޑު ސަބަބަކީ ރާއްޖެއަށް އަންނަ ފަތުރުވެރިންގެ އަދަދު ގިނަވުމެވެ. އެގޮތުން މިދިޔަ 2024 ވަނަ އަހަރު ފަުރުވެރިން ރާއްޖެއަށް ޒިޔާރަތް ކުރި އަދަދު ވަނީ ވަރަށް ބޮޑަށް އިތުރުވެފައެވެ. މީގެއިތުރުން ވެސް ޓޫރިޒަމް ދާއިރާގެ ޓެކްސްތަކުގެ ތެރޭގައި ހިމެނޭ ޓީޖީއެސްޓީ އާއި ގްރީން ޓެކްސްގެ އިތުރުން އެއާޕޯޓް ޓެކުހާއި ފީ ލިބުނު މިންވަރު ވެސް ވަނީ ވަރަށް ބޮޑަށް އިތުރުވެފައެވެ.

ޑިޕާޗާ ޓެކްސްގެ ގޮތުގައި 72.2 މިލިއަން ޑޮލަރު ލިބުނުއިރު އެއާޕޯޓް ޑިވެލޮޕްމަންޓް ފީގެ ގޮތުގައި 73.2 މިލިއަން ޑޮލަރު އަދި ގްރީން ޓެކްސްގެ ގޮތުގައި 70.4 މިލިއަން ޑޮލަރު މިދިޔަ އަހަރު ވަނީ ލލިބިފައެވެ. މީގެ އިތުރުން އިންކަމް ޓެކްސްގެ ގޮތުގައި 55.9 މިލިއަން ޑޮލަރު ރާއްޖެއަށް ލިބުނެވެ.