ކުރީގެ ރައީސް މުޙައްމަދު ނަޝީދު އަދި ދަ ޑިމޮކްރެޓްސްގެ އިތުރު ސިޔާސީ ލީޑަރަކު، އިދިކޮޅު މައި ޕާޓީ އެމްޑީޕީއާ ގުޅޭނެ ފަދަ ވާހަކަތަކެއް ނުދެކެވޭ ކަމުގައި މާފަންނު އުތުރު ދާއިރާގެ ކުރީގެ މެންބަރު އަދި ދަ ޑިމޮކްރެތްސްގެ ތަރުޖަމާނު އިމްތިޔާޒް ފަހުމީ (އިންތި) ވިދާޅުވެއްޖެއެވެ.

އިމްތިޔާޒް އެފަދައިން ވިދާޅުވީ، އެ ޕާޓީގެ ލީޑާޝިޕްގެ ތިން ބޭފުޅަކު އެ ޕާޓީން ވަކިވެވަޑައިގެން އިދިކޮޅު އެމްޑީޕީއާ ގުޅިވަޑައިގަތުމާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައެވެ.

އެގޮތުން ބޮޑުފެންވަޅުގޭގައި ބޭއްވި ނޫސްވެރިންގެ ބައްދަލުވުމުގައި "މެންދުރު ޓީވީ"ން ކުރި ސުވާލަކަށް ޖަވާބު ދެއްވަމުން އިމްތިޔާޒް ވިދާޅުވީ، ޕާޓީން ކޮންމެ މެންބަރަކު ވަކިވުމަކީ ވެސް، ޕާޓީއަށް ލިބޭ ގެއްލުމެއްކަމަށެވެ. އެހެން ނަމަވެސް ކުރީގެ ރައީސް ނަޝީދު އަދި އެ ޕާޓީގެ އިތުރު ސިޔާސީ ލީޑަރަކު، ޑިމޮކްރެޓްސް ދޫކޮށް އެމްޑީޕީއާ ގުޅިވަޑައިގަންނަވާނެ ފަދަ ވާހަކައެއް އެއްވެސް ގޮތަކަށް ނުދެކެވޭ ކަމުގައި އިމްތިޔާޒް ވިދާޅުވިއެވެ.

ޕާޓީން މެންބަރަކު ވަކިވުމަކީ ހަމަ ދެރަކަމެއް. އަދި އަޅުގަނޑުމެން އުންމީދުކުރަނީ އަދި އެއަށް ވުރެ ގިނަ ސިޔާސީ ބޭބޭފުޅުން، ލީޑަރުން ވެސް މި ޕާޓީއާ ގުޅިވަޑައިގަންނަވާނެ ކަމަށް. ރައީސް ނަޝީދު އެމްޑީޕީއާ ގުޅިވަޑައިގަންނަވައިފާނެތޯ ދެންމެ ތިޔަ ކުރެއްްވި ސުވާލެއް ދަންނަވައިފި. އެކަހަލަ ވާހަކައެއް ނެތް އެއްގޮތަކަށް ވެސް. ހަމަ އެއާއެކުގައި މި ޕާޓީގެ އެހެން މެންބަރުން ލީޑާޝިޕްގެ ނޫނީ އެހެން މަގާމުތަކުގައި ތިއްބެވި ބޭފުޅުން އެހެން ޕާޓީތަކާ ގުޅިވަޑައިގަންނަވައިފާނެތޯ، އެކަހަލަ ވާހަކަތަކެއް އަދި އަޅުގަނޑުމެންނަކަށް ނުއިވޭ އިނގޭތޯ. - މާފަންނު އުތުރު ދާއިރާގެ ކުރީގެ މެންބަރު އިމްތިޔާޒް ފަހުމީ

އިމްތިޔާޒް އިތުރަށް ވިދާޅުވީ، އެ ޕާޓީގެ ލީޑާޝިޕްގެ ބައެއް ބޭފުޅުން އެމްޑީޕީއާ ގުޅިވަޑައިގެންނެވި ނަމަވެސް، ޑިމޮކްރެޓްސް އޮންނާނީ ސިޔާސީ ގޮތުން ހަރުދަނާ މަސައްކަތްތަކެއް ކުރާ، ހަރުދަނާ ސިޔާސަތުތަކެއް ރައްޔިތުންނަށް ހުށަހަޅާ ނަމޫނާ ޕާޓީއެއްގެ ގޮތުގައި ކަމަށެވެ.

އަދި އެއާއެކު، އެ ޕާޓީއަށް މެންބަރުން އިތުރުކުރުމުގެ މަސައްކަތް ވެސް ހަލުވީ ކުރާނެ ކަމުގައި ވެސް އިމްތިޔާޒް ވިދާޅުވިއެވެ.

އިރާދަކުރެއްވިއްޔާ ހަމަ އެހެން ބޭފުޅުން ވެސް އެ ފާހަގަކުރެއްވި ފަދައިން ހަމަ ވަރަށް ބުރަ މަސައްކަތެއް ކުރާ، ވަރަށް ހަރުދަނާ މަސައްކަތްތަކެއް ކުރާ ވަރަށް ހަރުދަނާ ރަނގަޅު ސިޔާސަތުތަކެއް އެހެން އެއްވެސް ޕާޓީއަކަށް މި ރާއްޖޭގައި ރައްޔިތުންނާ ހަމައަށް ހުށަނޭޅޭ ފެންވަރުގެ ހަރުދަނާ ސިޔާސަތުތަކެއް ރައްޔިތުންނަށް ހުށަހެޅުމުގެ ސިޔާސީ ޕާޓީއެއްގެ ނަމޫނާ ދައްކަމުން މި ޕާޓީން ދާނީ އިރާދަކުރެއްވިއްޔާ. އައު ވިސްނުންތަކާއި، އައު ގޮތްތަކާއި، އައު ސިޔާސަތުތައް ހުށަހަޅާ ޕާޓީއެއްގެ ގޮތުގައި މި ޕާޓީ ދެމިދާނީ. އަދި ޕާޓީގެ މެންބަރުން އިތުރުކުރުމުގެ މަސައްކަތް އިރާދަކުރެއްވިއްޔާ އަޅުގަނޑުމެންގެ މަސައްކަތުން ކުރިއަށް ޖައްސާނެ، - މާފަންނު އުތުރު ދާއިރާގެ ކުރީގެ މެންބަރު އިމްތިޔާޒް ފަހުމީ

އިމްތިޔާޒް އެފަދައިން ވިދާޅުވިއިރު، ދަ ޑިމޮކްރެޓްސްގެ ރައީސްގެ މަގާމު ފުރުއްވި ހަސަން ލަތީފް އެ މަގާމުން އިސްތިއުފާ ދެއްވައި، އަލުން ވަނީ އެމްޑީޕީއާ ގުޅިވަޑައިގަންނަވައިފައެވެ. މީގެ އިތުރުން އެ ޕާޓީގެ ނައިބު ރައީސްގެ މަގާމުގައި ހުންނެވި މުހައްމަދު ޝިފާޒު އާއި، ހުޅުހެންވޭރު ދާއިރާގެ ކުރީގެ މެންބަރު އަލީ އާޒިމް އާއި، މިދިޔަ ރިޔާސީ އިންތިހާބުގައި ދަ ޑިމޮކްރެޓްސްގެ ރަނިން މޭޓެއްގެ ގޮތުގައި ނުކުންނެވި އެސްޓީއޯގެ ކުރީގެ އެމްޑީ ހުސައިން އަމްރު ވެސް ވަނީ އެމްޑީޕީއާ އަލުން ގުޅިވަޑައިގަންނަވައިފައެވެ.

އެ ބޭފުޅުން އެމްޑީޕީން ވަކިވެވަޑައިގެންނެވީ 2023 ވަނަ އަހަރުގެ ރިޔާސީ އިންތިހާބަށް ކައިރި ވެފައިވަނިކޮށް އެމްޑީޕީގެ ތެރޭގައި އުފެދުނު ޚިޔާލު ތަފާތުވުންތަކުގެ ތެރެއިންނެވެ. އެއާއެކު، ކުރީގެ ރައީސް ނަޝީދު އިސްވެ ހުންނަވައި ދަ ޑިމޮކްރެޓްސް އުފެއްދެވީއެވެ. އަދި އެ އަހަރުގެ ރިޔާސީ އިންތިހާބުގައި ވާދަކޮށް، އެ ޕާޓީން ވަނީ 15،000އެއްހާ ވޯޓު ވެސް ހޯދާފައެވެ. އެ ޕާޓީވީ، އެ އިންތިހާބުގެ ފުރަތަމަ ބުރުން ތިންވަނައަށް އެންމެ ގިނަ ވޯޓު ހޯދި ޕާޓީއަށެވެ.