އެމެރިކާގައި ރޯވެފައިވާ އަލިފާންގަނޑު ނިއްވާލުމަށްޓަކައި ޔޫކްރެއިންގެ ފަޔަރ ފައިޓަރުން އެމެރިކާއަށް ފޮނުވުމަށް ތައްޔާރަށް ހުންނެވި ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެއެވެ.

މި އަލިފާންގަނޑު ކޮންޓްރޯލްކުރުމަށް އެމެރިކާގެ ފަޔަރ ފައިޓަރުންނަށް ދަތިވަމުންދަނީ ބިމުއަޑީގައި ގާއިމުކޮށްފައިވާ އަލިފާން ނިއްވުމުގެ ނިޒާމު އަދާހުލިވެފައިވުމާއި، ވައިގަދަވުމުގެ ސަބަބުން އަލިފާން އެއްތަނުން އަނެއްތަނަށް ފެތުރެމުންދާތީއެވެ. ހުޅުހިފާ ކޮންމެ ތަނެއް މުޅިން އަނދައި ހުސްވުމަށްފަހުގައި މެނުވީ އަލިފާން މަޑުނުޖެހޭ ކަމަށް ރިޕޯޓުތަކުގައި ވެއެވެ.

145 ބިލިއަން ޑޮލަރުގެ ގެއްލުން ވެފައިވާ މި އަލިފާންގަނޑަކީ އެމެރިކާގެ ތާރީޚުގައި އެންމެ ބޮޑު ގެއްލުމެއް ލިބުނު އަލިފާނުގެ ހާދިސާއެވެ. އަލިފާންގަނޑު އިތުރަށް ފެތުރިއްޖެނަމަ، އެމެރިކާގެ އިޤްތިޞާދަށް ނުކަތާވަރުގެ ގެއްލުންތަކެއް ލިބޭނެކަމަށް ބެލެވެއެވެ.

ލޮސްއެންޖަލީސް ފަޔަރ ޑިޕާޓްމަންޓުގެ ޗީފް ޑެނިއަލް މާޓިން ވިދާޅުވި ގޮތުގައި، މި އަލިފާންގަނޑަކީ އެމެރިކާގެ ފަޔަރ ފައިޓަރުންނަށް ވެސް މިހާތަނަށް ދިމާވި އެންމެ ބޮޑު ގޮންޖެހުމެވެ. ކްރޭންގެ ފަޔަރ ފައިޓަރުންގެ އެހީ ލިބުމާއެކު، އަލިފާން ނިއްވުމުގެ މަސައްކަތް އިތުރަށް ހަރުދަނާ ވެގެންދާނެ ކަމަށް ލޮސްއެންޖަލީސް މޭޔަރ ކެރެން ބާސް ވިދާޅުވިއެވެ.

މިއަދާ ހަމައަށް ވެސް އަލިފާންގަނޑު ދަނީ އިތުރު ސަރަހައްދުތަކަށް ފެތުރެމުންނެވެ. ގިނަ އަދަދެއްގެ ރައްޔިތުން ވަނީ އެހެން ސަރަހައްދުތަކަށް ބަދަލުކުރެވިފައެވެ. އަލިފާން ނިއްވުމުގެ މަސައްކަތް ކުރިއަށްދާއިރު، މޫސުމީ ބަދަލުތަކާއި ވައިގެ ބާރުމިނަށް އަންނަ ބަދަލުތަކަކީ ވެސް ބޮޑު ގޮންޖެހުމެއް ކަމަށް ފަޔަރ ފައިޓަރުން ފާހަގަކުރެއެވެ.