މާލޭގައި އެންމެ ގިނައިން ފެން ޖަމާވާ ދިމާތަކުން މޫދަށް ފެން ބޭރުކުރެވޭނެ ގޮތް ހަދައިފިއެވެ.

މިކަމާ ގުޅިގެން ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާއިން ބުނީ މިހާރު މުޅި ރާއްޖެއަށް ކުރަމުންދާ ވިއްސާރައާ ގުޅިގެން، އާންމު ރައްޔިތުންނަށް ލިބޭ ގެއްލުންތައް ކުޑަކުރުމަށް ޓަކައި ރައީސުލްޖުމްހޫރިއްޔާ އުފެއްދެވި ޚާއްޞަ ޓާސްކްފޯހުގެ އިރުޝާދުގެ ދަށުން މާލޭގެ ގޭގެއަށް ވެލި ބަސްތާ ދޫކުރުމަށް، ޑިޒާސްޓަރ މެނޭޖުމެންޓް އޮތޯރިޓީގެ ލަފާގެ މަތިން، ވެލި ބަސްތާ ތައްޔާރުކޮށް ދޫކުރުމުގެ މަސައްކަތް އެ މިނިސްޓްރީގެ ޕަބްލިކް ވާރކްސް ޑިޕާރޓްމެންޓުން ކޮށްފައިވާކަމަށެވެ.

Ad by Hajj Corporation

އެ ގޮތުން މާލޭގެ ގޭގެއަށް ދޫކުރުމަށް ގާތްގަނޑަކަށް 1000 ބަސްތާ ވެލި ތައްޔާރު ކުރެވިފައި ވާކަމަށާއި ހައުސިންގ މިނިސްޓްރީ ކުރިން ހުރި ގޯތިތެރޭގައި ކުރެވުނު މި މަސައްތައް ބައްލަވައިލެއްވުމަށް ވަޒީރު އާދަމް ޝަރީފު ޢުމަރު ވަޑައިގެން މަސައްކަތްކުރެއްވި މުވައްޒަފުންނަށް ހިތްވަރު ދެއްވާފައިވާކަމަށް މިނިސްޓްރީން މައުލޫމާތުދެއެވެ.

މީގެ އިތުރުން މާލޭގައި، އެންމެ ގިނައިން ފެން ޖަމާވާ ދިމާތަކުން، އެމް.އެން.ޑީ.އެފްގެ އިރުޝާދުގެ މަތިން މޫދަށް ފެން ބޭރުކުރެވޭނެ ގޮތް ވެސް މިނިސްޓްރީގެ މުވައްޒަފުން ކޮށްފައިވާކަމަށާއި އެ ގޮތުން ޕޯސްޓް އޮފީހާ ދިމާއިންނާއި، މާލޭ ޖަލާ ދިމާއިން މޫދަށް ފެން ބޭރުކުރެވޭނެ ގޮތް ވަނީ ހަދައިފައިކަމަށް މިނިސްޓްރީން ބުނެއެވެ.

ވިއްސާރައާ ގުޅިގެން އަތޮޅުތެރޭގެ ޙާލަތު ކުލަސްޓަރ ނިޒާމުގެ ތެރޭން ދެނެގަނެ، އެ ސަރަޙައްދެއްގެ ޕޮލިހުންނާއި، ސިފައިން މެދުވެރިކޮށް އަވަސް ޙައްލެއް އެ ރައްޔިތުންނަށް ހޯއްދަވައި ދެއްވުމަށް ވެސް މިނިސްޓްރީ އޮތީ، ތައްޔާރީ ޙާލަތުގައިކަމަށާއި އަދި ޕަބްލިކް ވާރކްސް ރީޖަނަލް ޑިޕާރޓްމެންޓްތައް ހުރި ރަށްރަށުން ވެސް ދުރާލާ މި ކަމަށް ވާންޖެހޭ ތައްޔާރީތައް ވަނީ ވެފައިކަމަށް މިނިސްޓްރީން މައުލޫމަތުދެއެވެ.