ރާއްޖޭގައި ހިމާޔަތްކުރެވިފައިވާ މަޑީގެ ބާވަތްތަކަށް ކާންދިނުމަކީ މަނާކަމެއްކަމަށް އެންވަޔަރަމެންޓް ޕްރޮޓެކްޝަން އޭޖެންސީ (އީޕީއޭ) އިން ބުނެފިއެވެ.

ދިރާސާތައް ދައްކާ ގޮތުން މަޑީގެ ބާވަތްތަކަށް ކާންދިނުމާއި، ކާން އެޅުމަކީ އެތަކެތީގެ ގުދުރަތީ އާދަތަކަށް ނޭދެވޭ އަސަރުކުރާ ކަމަކަށް ވާތީ އީޕީއޭއިން ވަނީ އެކަން މަނާކޮށްފައެވެ. އަދި މަޑީގެ ބާވަތްތައް ބެލުމަށްޓަކައި އެތަކެއްޗާއެކު މޫދުގައި ފީނުމަކީ ދިވެހީން އަދި ފަތުރުވެރިންގެ ތެރޭގައި މަޤުބޫލުކަމަކަށް ވީނަމަވެސް، މި ހަރަކާތްތަކުގެ ސަބަބުން މީހުންނަށް އެކި ކަހަލަ އަނިޔާވެ ނުރައްކާތެރި ހާދިސާތައް ދިމާވާން ކުރިމަތިވާތީ މިކަމަށް ސަމާލުވުމަށްވެސް އީޕީއޭއިން ވަނީ އިލްތިމާސްކޮށްފައެވެ.

މަޑީގެ ފަރާތުން އިންސާނުންނަށް އަނިޔާވުމަށް މެދުވެރިވާ މައިގަނޑު އެއް ސަބަބަކީ، މަޑި އުޅޭ ސަރަހައްދުތަކަށް ގިނަ އަދަދެއްގެ މިޔަރު އެއްވެ އެތަކެއްޗަށް ކާންދޭން އުޅުމުގެ ތެރޭގައި މިޔަރު ދަތް އަޅާ، ނުވަތަ މަޑި ކަށި ހެރުން ފަދަ ހާދިސާތައް ހިނގާތީއެވެ.

ރާއްޖެ އަންނަ ފަތުރުވެރިންވެސް މިފަދަ ހަރަކާތްތަކުގައި ބައިވެރިވާތީ، މިފަދަ ހާދިސާއެއް ހިނގުމަކީ ރާއްޖޭގެ ފަތުރުވެރިކަމަށް އަސަރުކުރާނެކަމެއްގެ ގޮތުގައި އީޕީއޭއިން ފާހަގަކުރެއެވެ. އެހެންކަމުން މަޑިތަކަށް ކާންދިނުން ހުއްޓުވުމަށް އެ އޭޖެންސީއަށް ގިނަ ޝަކުވާތަކެއް ހުށަހެޅިފައިވާކަމަށްވެސް އީޕީއޭއިން ބުނެއެވެ.

މަޑީގެ ބާވަތްތައް ހިމާޔަތް ކުރުމަތް ހެދިފައިވާ ގަވައިދުތަކާއި އުސޫލުތަކާ ހިލާފުވާ ފަރާތްތަކަށް، "ގުދުރަތީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާ ބެހޭ ގަވައިދު" ގެ ދަށުން ފިޔަވަޅު އެޅޭނެކަމަށް އީޕީއޭއިން ބުނެއެވެ.