ސައުދީ އަރަބިއްޔާގެ އަލް-ހިލާލްގެ ބްރެޒިލްގެ ސްޓާރ ކުޅުންތެރިޔާ ނެއިމާ ޖޫނިއަރ އޭނާގެ ކެރިއަރު ފެށި ކްލަބް، ބްރެޒިލްގެ ސެންޓޯސްއަށް އެނބުރި ދިއުމުގެ މަގުމަތީގައިވާ ކަމަށް ރިޕޯޓުތަކުން ބުނަންފަށައިފިއެވެ.

Ad by Hajj Corporation

2023 ވަނަ އަހަރުގެ އޮގަސްޓް މަހު އަލް-ހިލާލްއާ ގުޅުނު ނޭމާއަށް، އެ އަހަރުގެ އޮކްޓޯބަރު މަހު އޭސީއެލް އަށް އަނިޔާވެ ގިނަ ދުވަސްތަކެއް ކުޅުމާއި ދުރުގައި ހުރުމަށްފަހު، ކުޅުމުގެ ތެރެއަށް މިދިޔަ ނޮވެމްބަރ މަހުގައި އައިސް ދެމެޗު ކުޅުމަށްފަހު އަނެއްކާވެސް ވަނީ އަނިޔާވެ ކުޅުމާއި ދުރުގައެވެ. އަންނަ ޖޫން އަށް ނޭމާގެ އަލް-ހިލާލް ގެ އެއްބަސްވުން ހަމަވާއިރު، އަލް-ހިލާލް އިން އެއްބަސްވުން އާނުކުރާނެ ކަމަށް ރިޕޯޓްތަކުން ބުނެއެވެ.

އެހެންކަމުން މި ޖަނަވަރީ މަހުގައި ސެންޓޯސްއަށް ލޯނު އުސޫލުން ބަދަލުވުމަށް އެދި އެ ކްލަބުން ވަނީ އަލް-ހިލާލްއަށް ހުށަހަޅާފައެވެ. އަނިޔާގެ ސަބަބުން މި ސީޒަނުގެ ބާކީ ދުވަސްތަކުގައި އަލް-ހިލާލްގެ އިންޓަރނޭޝަނަލް މުބާރާތްތަކުން ނޭމާގެ ނަން ވަނީ އުނިކޮށްފައެވެ. އެހެންކަމުން ކޮންޓިނެންޓަލް މުބާރާތްތަކުގައި ނުކުޅެވުމާއެކު، ސީރިއަސް އިންޖަރީއަކުން އަރައިގަތުމަށްފަހު ކުޅުމުގެ ފޯމާއި ޖޯޝް އަލުން ހޯދުމަށް މިދުސްކޮޅުގައި ނޭމާ ގެ އުފަން ޤައުމުގައި ކުޅުމަކީ މުހިންމު ކަމެއްކަމުގައި ނޭމާ ދެކެއެވެ.

2017 ވަނަ އަހަރު 222 މިލިއަން ޔޫރޯގެ ރެކޯޑު އަގަކަށް ޕެރިސް ސެއިންޓް-ޖަރމަންއަށް ބަދަލުވުމުގެ ކުރިން ނެއިމާގެ ކެރިއަރު ފެށިގެން ދިޔައީ ސެންޓޯސްގައެވެ. މިހާރު އެމެރިކާގެ ބައެއް ކްލަބުތަކުންވެސް ނެއިމާއަށް ޝައުގުވެރިކަން ފާޅުކުރަމުންދާ ކަމަށް ރިޕޯޓުތަކުން ދައްކައެވެ.