ރ. އުނގޫފާރުން އައިޑީ ކާޑު ޕްރިންޓުކުރުމާއި، ޕާސްޕޯޓު ދޫކުރުމުގެ ޚިދުމަތް އިފްތިތާހުކޮށްފިއެވެ.

މުޅި ރާއްޖެއަށް ޕާސްޕޯޓު އަދި އައިޑީ ކާޑުގެ ޚިދުމަތް ފުޅާކުރުމަކީ ރައީސުލްޖުމްހޫރިއްުޔާ ޑރ. މުޙައްމަދު މުޢިއްޒުގެ ވައުދުފުޅެކެވެ. އެ ވައުދުފުޅުގެ ދަށުން އެ ޚިދުމަތް އުނގޫފާރުގައި ފެށީ، ރ. އަތޮޅަށް އެމަނިކުފާނު ކުރައްވަމުން ގެންދަވާ ދަތުރުފުޅުގެ ތެރެއިން ރޭގެ ވަގުތެއްގައެވެ.

އެގޮތުން ރޭ ބޭއްވި ޙަފުލާގައި ރ. އަތޮޅުން ޕާސްޕޯޓު އަދި އައިޑީކާޑު ލިބުމުގެ ޚިދުމަތް އެމަނިކުފާނު އިފްފިތާޙްކޮށްދެއްވިއިރު، މިއަދުން ފެށިގެން "އިމުގާ" މެދުވެރިކޮށް ހުށަހަޅާ ޕާސްޕޯޓުތައް، ރ. އުނގޫފާރުން ނެގުމުގެ އިންތިޒާމު ހަމަޖެހިފަިއވާ ކަމުގައި އިމިގްރޭޝަނުން ބުނެއެވެ.

އައިޑީ ކާޑާއި ޕާސްޕޯޓު، ރައްޔިތުންނާ ގާތުން އަވަހަށް ފޯރުކޮށްދިނުމުގެ ޚިދުމަތް މުޅި ރާއްޖެއަށް ފުޅާކުރުމުގެ މަސައްކަތް އިފްތިތާޙްކޮށްފައި ވަނީ މިދިޔަ ނޮވެމްބަރު މަހުގެ ތެރޭގައެވެ.

އެ މަސައްކަތުގެ ދަށުން، މާލެ ސަރަހައްދުގެ އިތުރުން، ލ. އަތޮޅާއ، ދ. އަތޮޅުން ވެސް ޕާސްޕޯޓާއި އައިޑީކާޑު ލިބޭނޭ ގޮތް މިހާރު ވަނީ ފަހިކޮށްފައެވެ. އެ ޚިދުމަތްތައް ފަށައިފައިވަނީ ވެސް މިދިޔަ ނޮވެމްބަރު މަހުގެ ތެރޭގައެވެ.