މެޗުގެ އިތުރު ވަގުތުގެ 2 ވަނަ މިނެޓުގައ ކެޕްޓަން ބްރޫނޯ ފެނާންޑޭޒް ޖެހި ގޯލުން މެންޗެސްޓަރ ޔުނައިޓޭޑު މޮޅުވެ، ޔުއޭފާ ޔޫރޮޕާ ލީގުގެ ގަދަ 8 އިން ޖާގަހޯދުމާއި ގާތަށް ޔުނައިޓެޑު ޖެހިލައިފިއެވެ. އޯލްޓްރެފޯޑްގައި ސްކޮޓްލޭންޑް ގެ ރޭންޖަރސް އާއި ދެކޮޅަށް ކުޅުނު މިމެޗު ޔުނައިޓެޑު ކާމިޔާބުކުރީ 2-1 އިންނެވެ.

މެޗުގެ ބޮޑުބައެއް ޔުނައިޓެޑުން ކޮންޓްރޯލްކޮށްގެން ކުޅުނު މިމެޗުގައި ފުރަތަމަ ހާފު ނިމުނީ އެއްވެސް ޓީމަކުން ގޯލެއް ނުޖެހިއެވެ. ދެވަނަ ހާފުގައި 52 ވަނަ މިނެޓުގައި ޔުނައިޓެޑުން ކާމިޔާބުކުރި މެޗުގެ ފުރަތަމަ ގޯލަކީ ޔުނައިޓެޑަށް ލިބުނު ކޯނަރެއްގައި ރޭންޖަރސް ގެ ކީޕަރު އަތުން ބައިކޮޅަށް ވަތް ގޯލެކެވެ. ނަމަވެސް މެޗުގެ 88 ވަނަ މިނެޓުގައި ރޭންޖަރސްގެ ނައިޖީރިއާގެ ފޯވާޑް ޑެސަރސް ވަނީ ގޯލުޖަހައި ނަތީޖާ ހަމަކޮށްފައެވެ. ޔުނައިޓެޑު މޮޅުކޮށްދިނީ ފަހު ވަގުތުގައި ބްރޫނޯ ޖެހި ގޯލުންނެވެ.

ރޭގެ މޮޅާއެކު ޔުނައިޓެޑު އޮތީ ކުޅުނު 7 މެޗުން ލިބުނު 15 ޕޮއިންޓާއެކު ތާވަލުގެ 4 ވަނައިގައެވެ. މިމުބާރާތުގެ ގްރޫޕް ސްޓޭޖުގެ ފަހުމެޗުގައި ޔުނައިޓެޑު ވާދަކުރަންޖެހޭނީ ރޮމޭނިއާގެ އެފް.ސީ.އެސް.ބީ އާއި ދެކޮޅަށެވެ.