ކުރީގެ ރައީސް އިބްރާހިމް މުޙައްމަދު ޞާލިޙްގެ ވެރިކަމުގައި އުފެއްދި އިންތިގާލީ އިންސާފުގެ އޮފީހަށް ތިން އަހަރު ތެރޭގައި 40 މިލިއަނެއްހައި ރުފިޔާ ޚަރަދުވެފައިވާކަން އޮޑިޓަރ ޖެނެރަލްގެ އޮފީހުން އާންމުކުރި ރިޕޯޓުތަކުން ހާމަވެއްޖެއެވެ.

ނަމަވެސް މި އޮފީހުން މާ ބޮޑު ނަތީޖާއެއް ނެރެފައިނުވާކަން ފާހަގަކުރެވެއެވެ.

އިންތިގާލީ އިންސާފުގެ އޮފީސް އުފެއްދީ 2020 ވަނަ އަހަރުގެ ޑިސެމްބަރު 17 ގައެވެ. މި އޮފީސް އުފެއްދުމުގެ މަޤްޞަދަކީ 1953 ވަނަ އަހަރުގެ ޖަނަވަރީ 1 އިން ފެށިގެން، އިންސާނީ ޙައްޤުތަކާއި އަސާސީ މިނިވަންކަމަށް އަރައިގަނެ ހިންގާފައިވާ ކަންކަމަށް އިންސާފު ހޯދައިދިނުމެވެ. އެހެންނަމަވެސް، މި އޮފީސް އުވާލެވުނުއިރުވެސް މި މަޤްޞަދު ޙާޞިލުކުރެވިފައިނުވާކަން ފާހަގަކުރެވެއެވެ.

އޮޑިޓަރ ޖެނެރަލްގެ އޮފީހުން އާންމުކޮށްފައިވާ 2022 އަދި 2023 ވަނަ އަހަރުގެ މާލީ އޮޑިޓު ރިޕޯޓުތަކުގައިވާ ހިސާބުތަކަށް ބަލާއިރު، 2023 ވަނަ އަހަރު އިންތިގާލީ އިންސާފުގެ އޮފީހަށް ޖުމްލަ 13.4 މިލިއަން ރުފިޔާ ޚަރަދުކޮށްފައިވެއެވެ. 2022 ވަނަ އަހަރު 14.2 މިލިއަން ރުފިޔާ އަދި 2021 ވަނަ އަހަރު 11.8 މިލިއަން ރުފިޔާ ޚަރަދުކޮށްފައިވާކަން ފާހަގަކުރެވެއެވެ. މި ތިން އަހަރުގެ ޖުމްލަ ޚަރަދަކީ 39.4 މިލިއަން ރުފިޔާއެވެ.

މި ބޮޑު އަދަދެއްގެ ފައިސާ ޚަރަދުކޮށްފައިވީ ނަމަވެސް، އިންތިގާލީ އިންސާފުގެ އޮފީހުން އޭގެ މަޤްޞަދު ޙާޞިލުކުރުމަށް ކޮށްފައިވާ މަސައްކަތްތަކާއި ނެރެފައިވާ ނަތީޖާތަކުގެ ތަފްޞީލު މި ވަގުތު ލިބެން ނެތްކަން ފާހަގަކުރަމެވެ. މިކަމާ ގުޅޭގޮތުން އިތުރު މަޢުލޫމާތު ހޯދުމަށް ކުރި މަސައްކަތް ކާމިޔާބުނުވިއެވެ.

މި ހާލަތުގައި، ދައުލަތުގެ ބަޖެޓުން މިފަދަ ބޮޑު އަދަދެއްގެ ފައިސާ ޚަރަދުކޮށްފައިވާއިރު، އޭގެ ނަތީޖާ ރައްޔިތުންނަށް ނުފެންނަކަމީ ކަންބޮޑުވާންޖެހޭ ކަމެއް ކަމުގައި ގިނަ ފަރާތްތަކުން ދެކެއެވެ. މިކަމާ ގުޅޭގޮތުން އިތުރު ތަޙްޤީޤުތައް ކުރިއަށްދާނެކަމަށް އުއްމީދުކުރެވެއެވެ.