ސްޕްރިންގް ފެސްޓިވަލް އަދި ޗައިނާގެ އައު އަހަރުގެ ތަހުނިޔާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޗައިނާގެ ރައީސް ޝީ ޖިންޕިން އަދި ޗައިނާ ރައްޔިތުންގެ ޖުމްހޫރިއްޔާގެ ސްޓޭޓް ކައުންސިލްގެ ޕްރިމިއާ، ލީ ޗިއާންގް އަށް ފޮނުއްވައިފިއެވެ.

ރައީސް އޮފީހުން މިއަދު ބުނި ގޮތުގައި، ރައީސް އެ ދެބޭފުޅުންނަށް ތަހުނިޔާ ދަންނަވާފައިވަނީ އެ ދެބޭފުޅުންނަށް މިއަދު ވަކިވަކިން ފޮނުއްވި ސިޓީތަކުންނެވެ. އެގޮތުން އެ ސިޓީތަކުގައި ރައީސް ވަނީ ދިވެހި ސަރުކާރާއި ރައްޔިތުންގެ ފަރާތުން ޗައިނާގެ ވެރިކަމާއި ރައްޔިތުންނަށް ހޫނު މަރުޙަބާއާއި އެންމެ ހެޔޮ އެދުންތައް ފޮނުއްވާފައެވެ.

Ad by Hajj Corporation

އަދި "ވަން ޗައިނާ" ޕޮލިސީއަށް ރާއްޖެއިން އަބަދުވެސް ތާއީދުކުރާކަން އަލުން ކަށަވަރުކޮށްދެއްވައި، ދެ ޤައުމުގެ މަންފާއަށްޓަކައި ގުޅުން ވަރުގަދަކުރުމުގެ މުހިންމުކަން ރައީސް ވަނީ ފާހަގަކުރައްވާފައެވެ. އަދި ދެ ޤައުމުގެ ގާތް ގުޅުން ދެމެހެއްޓުމަށްޓަކައި ޗައިނާ-ރާއްޖެ ޖާމިޢު އިސްތިރާތީޖީ އެއްބާރުލުމުގެ ޕާޓްނާޝިޕް ހަރުދަނާކުރުމުގެ މުހިންމުކަން ވެސް ރައީސް ވަނީ ފާހަގަކުރެއްވިއެވެ.

ރާއްޖެއާއި ޗައިނާއާ ދެމެދު ޑިޕްލޮމެޓިކް ގުޅުން ޤާއިމުކުރެވުނީ 14 އޮކްޓޯބަރު 1972 ގައެވެ.