ސައުދީ ޢަރަބިއްޔާގެ ޚާރިޖީ ވަޒީރު، ފައިޞަލް ބިން ފަރްޙާން އަލް ސަޢޫދުގެ ދަޢުވަތަކަށް ޚާރިޖީ ވަޒީރު ޑރ. ޢަބްދުالله ޚަލީލް ރަސްމީ ދަތުރުފުޅެއްގައި ސަޢޫދީ ޢަރަބިއްޔާއަށް ރޭ ފުރާވަޑައިގަންނަވައިފިއެވެ.

ޚާރިޖީ ވުޒާރާއިން ބުނި ގޮތުގައި، ވަޒީރު ޚަލީލްގެ މި ދަތުރުފުޅުގައި ސައުދީގެ ޚާރިޖީ ވަޒީރު ފައިސަލްއާ ބައްދަލުކުރައްވައި، ރާއްޖެ އާއި ސައުދީއާ ދެމެދު އޮންނަ ޒަމާންވީ ރަހްމަތްތެރިކަމުގެ ގުޅުން އިތުރަށް ބަދަހިކުރެވޭނެ ގޮތްތަކާއި، އިތުރު ދާއިރާތަކުން ދެ ގައުމު ގުޅިގެން މަސައްކަތްކުރެވޭނެ ދާއިރާތަކާއި ފުރުސަތުތަކާ ގުޅޭ ގޮތުން މަޝްވަރާކުރައްވާނެއެވެ.

އަދި ސައުދީގެ މިނިސްޓާ އޮފް ކޮމާސްއާ ބައްދަލުކުރައްވައި، ދެ ޤައުމުގެ ދެމެދުގައި ވިޔަފާރީގެ ދާއިރާއިން ގުޅުން ބަދަހިކުރުމާއި ރާއްޖޭގައި ސައުދީ އިން އިންވެސްޓްމަންޓްތައް އިތުރުކުރުމަށް ކުރެވިދާނޭ ކަންކަމާ ގުޅޭގޮތުން މަޝްވަރާކުރެއްވުމަށް ވެސް ހަމަޖެހިފައިވާ ކަމަށް ޚާރިޖީ ވުޒާރާއިން ބުންޏެވެ،

މި ދަތުރުފުޅުގައި ވަޒީރު ޚަލީލްގެ އަރިހުގައި ޚާރިޖީ ވުޒާރާގެ ސެކްރެޓަރީ، ބައިލެޓަރަލް ޑރ. ހާލާ ހަމީދާއި އެ ވުޒާރާގެ ޖޮއިންޓް ސެކްރެޓަރީ އަލްފާޟިލާ ޚަދީޖާ ނަޖީހާ ވެސް ބައިވެރިވެވަޑައިގަންނަވައެވެ.