އެމްޑީޕީއަކީ އެއްވެސް އިރެއްގައި ގައުމުގެ މަސްލަޙަތު އިސްކޮށްގެން ވެރިކަމަށް ފައިނަގާ ޕާޓީއެއް ނޫން ކަމަށް ޚާރިޖީ ވަޒީރު ޑރ. އަބްދުﷲ ހަލީލް ވިދާޅުވެއްޖެއެވެ.

ރާއްޖޭގެ ނޫހެއްގެ ޚަބަރެއްގެ އެކްސްގައި ރީ ޕޯސްޓުކުރައްވަމުން ވަޒީރު ޚަލީލް ވިދާޅުވީ، އެމްޑީޕީގެ ވެރިކަމުން ފެނުނީ ގައުމީ ސަލާމާއި ގައުމީ ދިދަ ފަދަ ގައުމިއްޔަތު ރަމްޒުކޮށްދޭ ކަންކަން އެމްޑީޕީގެ ސިޔާސާތުގައި ނުހިމެނޭތަންކަން ކަމަށެވެ.

"ގައުމީ ސަލާމާއި ގައުމީ ދިދަ ފަދަ ގައުމިއްޔަތު ރަމްޒުކޮށްދޭ ކަންކަމަށް އެމްޑީޕީގެ ސިޔާސަތު ގައި އިސްކަމެއް ނުދޭ ތަން އެބައިމީހުންގެ ވެރިކަމުން ވެސް ރައްޔިތުންނަށް ފެނުނީ!" ވަޒީރު ވިދާޅުވިއެވެ.

ވަޒީރު އެފަދައިން ވިދާޅުވީ، ރޭ ހއ. ދިއްދޫއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޑައިގެން، އެ ރަށުގެ ރައްޔިތުންނާ ބައްދަލުކުރެއްވުމަށް ބޭއްވެވި ޖަލްސާ ނިންމުމަށް ގައުމީ ސަލާމު ކިޔަމުން ދިޔަ ވަގުތު ވެސް، އިދިކޮޅު އެމްޑީޕީގެ ސަޕޯޓަރުން ހަޑި ހުތުރުބަހުން އަޑުގަދަކުރި ކުރުމަށް އިޝާރަތްކުރައްވަމުންނެވެ.

އެގޮތުން ދިއްދޫގެ ރައްޔިތުންނާ ރައީސް މުޚާތަަބު ކުރައްވައި ވާހަކަފުޅު ދެއްކެވި ވަގުތުގައި ވެސް، އެމްޑީޕީގެ ފަރާތްތަކުން ވަނީ އަޑުގަދަކޮށް، ބާރަށް ލަވަ ޖަހައި ރައީސަށް ފާޑުކިޔާފައެވެ. އަދި ގައުމީ ސަލާމް ޖެހި ވަގުތު ވެސް އެ ފަރާތްތަކުން ހަޑި ހުތުރު ބަހުން އަޑުގަދަކުރުމުން، އެކަމާ އެރަށުގެ ބައެއް ފަރާތްތަކުން ވަނީ ހިތްހަމަނުޖެހުން ވެސް ފާޅުކޮށްފައެވެ.