ބަލި ކުޑަ ކުއްޖަކާއި އިތުރު ފަސް މީހުންނާއެކު ދަތުރުކުރި މެޑިކަލް ޓްރާންސްޕޯޓް ޖެޓެއް އެމެރިކާގެ ފިލަޑެލްފިއާގެ އަވަށަކަށް ވެއްޓިއްޖެ އެވެ.

އެމެރިކާގެ ޖެޓް ރެސްކިއު އެއާ އެމްބިއުލާންސް އިން ހުކުރު ދުވަހު ބުނީ އެ ބޯޓުގައި ހަތަރު ފަޅުވެރިންނާއެކު ބަލި ކުޑަ ކުއްޖަކާއި އިތުރު ފަސިންޖަރަކު ތިބި ކަމަށެވެ.

އަދި ސަލާމަތްވި އެއްވެސް ފަރާތެއް ކަށަވަރު ކޮށްދެވެން ނެތް ކަމަށް ވެސް އެ ކުންފުނިން ބުންޏެވެ.

އެ ޙާދިސާއާ ގުޅިގެން އެ ސިޓީގެ މޭޔަރު ޗެރެލް ޕާކާ މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ މަރުވި މީހުންގެ މައުލޫމާތު އަދި ނޭނގޭ ކަމަށާއި ނަމަވެސް ބައެއް ގެތަކަށާއި ވެހިކަލްތަކަށް ގެއްލުންވެފައިވާ ކަމަށެވެ.

މި ބޯޓު ވެއްޓުނީ މައިގަނޑު ގޮތެއްގައި ބިޒްނަސް ޖެޓްތަކާއި ޗާޓަރު ފްލައިޓްތަކަށް ހިދުމަތް ދޭ ނޯތު އީސްޓް ފިލަޑެލްފިއާ އެއާޕޯޓާއި 4.8 ކިލޯމީޓަރު ދުރުންނެވެ.

ލިއާޖެޓް 55 ނަމަކަށް ކިޔާ މި މަތިންދާބޯޓު އެއާޕޯޓުން 6:06 ގައި ފުރައިގެން 1600 ފޫޓުގެ އުސްމިނަކަށް އެރުމަށްފަހު ވަރަށް އަވަހަށް ރާޑަރުން ގެއްލުނެވެ.

މި ބޯޓު ވެއްޓުނީ އެމެރިކާގެ މިހާތަނަށް ވައިގެ އެންމެ ނުރައްކާތެރި ކާރިސާ ހިނގިތާ ދެ ދުވަސް ފަހުންނެވެ. މިދިޔަ ބުދަ ދުވަހުގެ ރޭ 60 ފަސިންޖަރުންނާއި ހަތަރު ފަޅުވެރިންނާއެކު ދަތުރުކުރި އެމެރިކަން އެއާލައިންސްގެ ޖެޓަކާއި ތިން ސިފައިން ގޮވައިގެން ދަތުރުކުރި އަސްކަރިއްޔާގެ ހެލިކޮޕްޓަރެއް ވަނީ މިޑްއެއާގައި ޖެހި އެކްސިޑެންޓްވެފަ އެވެ. އެ އެކްސިޑެންޓުގައި އެއްވެސް މީހަކު ސަލާމަތްވެފައެއް ނުވެއެވެ.