ހައްދުންމަތީ ގަމު (ލ.އަތޮޅު)ގެ ކުނި މެނޭޖްކުރުމުގެ މަސައްކަތް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި، ގަމު ކައުންސިލާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާ ދެމެދު މިއަދު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގެ ދަށުން، އަންނަ ހަފްތާއިން ފެށިގެން ގަމުގައި ޢަމަލީ ގޮތުން ކުނި ނެގުމުގެ މަސައްކަތް ފެށިގެންދާނެ ކަމަށް ވެމްކޯއިން ވަނީ މިއަދު ބުނެފައެވެ.

Ad by Hajj Corporation

މި އެއްބަސްވުމުގެ ސަބަބުން، ލ. ގަމުގައި އުފެދޭ ކުނި ތިމާވެށްޓާ ރައްޓެހި ގޮތްތަކަށް ނައްތާލުމުގެ ފުރުޞަތު ލިބިގެންދާނެ ކަމަށް ވެމްކޯއިން ބުނެފައިވެއެވެ. މީގެ އިތުރުން، މި މަޝްރޫޢުގެ ސަބަބުން ރަށުގައި ގިނަ އަދަދެއްގެ ވަޒީފާގެ ފުރުޞަތުތަކެއް ފަހިވެގެންދާނެ ކަމަށްވެސް ވަނީ ފާހަގަކޮށްފައެވެ.

މި ކަމާ ގުޅޭގޮތުން ގަމު ދާއިރާގެ މެންބަރު ޔޫސުފް ނަޝީދު ވަނީ މި މަޝްރޫޢު ޙަޤީޤަތަކަށް ހެދުމުގައި ގަމު ކައުންސިލުން ދެއްވި އެއްބާރުލުމާއި، ވެމްކޯގެ މެނޭޖިންގ ޑިރެކްޓަރ ކުރެއްވި ބުރަ މަސައްކަތް ފާހަގަކޮށް ޝުކުރު ދަންނަވާފައެވެ.

'' އަދި ރައީސުލްޖުމްހޫރިއްޔާ މުޙައްމަދު މުޢިއްޒު މި ކަމުގައި އިތުރު ޝުކުރެއް އަދާކުރަން" ޔޫސުފް ނަޝީދު ވިދާޅުވެފަވެއެވެ.

މި މަޝްރޫޢަކީ ސަރުކާރުގެ ތިމާވެށި ރައްކާތެރިކުރުމުގެ އެޖެންޑާގެ ތެރެއިން ކުރިއަށްގެންދާ މުހިންމު މަސައްކަތެކެވެ. އަދި މި މަޝްރޫޢުގެ ސަބަބުން ގަމުގެ ރައްޔިތުންނަށް ސާފު އަދި ޞިއްޙީގޮތުން ރައްކާތެރި މާޙައުލެއް ޤާއިމުކުރުމަށް މަގުފަހިވެގެން ދާނެއެވެ.