ގއ. ވިލިނގިލީގައި ހުންނަ ގއ. އަތޮޅު ހޮސްޕިޓަލުގެ އިހުމާލުން ދެމައިން މަރުވި މައްސަލަ އިންސާފު ހޯދައި ދިނުމަށް އެދި އެ ރަށުގައި އިހުތިޖާޖު ކުރަން ފަށައިފި އެވެ.

އެ މައްސަލާގައި އިންސާފުވެރި ތަހުގީގެއްކޮށް އިހުމާލުވި ބަޔަކާ މެދު ފިޔަވަޅު އެޅުމަށް ގޮވާލާ ގއ ވިލިނގިލީ ހޮސްޕިޓަލް ކައިރިއަށް އެރަށުގެ ރައްޔިތުން ވަނީ އެއްވެ އިހުތިޖާޖު ކޮށްފަ އެވެ. އިހުތިޖާޖުގެ ބައިވެރިން ވަނީ އެކި ޝުއޫރުތައް ލިޔެފައިވާ ބެނާ ތަކާއި ޕޯށްޓަރުތައް ހިފައިގެން ރަށުގައި ހިނގާލާފަ އެވެ. އިހުތިޖާޖުގެ ބައިވެރިން ގޮވާލަމުންދިޔައީ ދެމައިންގެ މަރުގެ މައްސަލަ އަވަހަށް ތަހުގީގުކޮށް، އިންސާފު ހޯދައި ދިނުމަށެވެ.

Ad by Hajj Corporation

އިއްޔެ ގއ. އަތޮޅު ހޮސްޕިޓަލަށް ވިހެއުމަށް ދިޔަ އަންހެނަކަށް ސިޒޭރިއަން ހެދުން ލަސްވެ ދެމައިން ވަނީ ނިޔާވެފައެވެ. އެގޮތުން އެ ދެމައިން ނިޔާވީ ހޮސްޕިޓަލުން ދޭންޖެހޭ ފުރިހަމަ ފަރުވާ ނުދެވި، ލަސްކުރުމުގެ ސަބަބުން ކަމަށް ބުނެ އެ ރަށުގައި ޢާންމުން ހިތްހަމަނުޖެހުން ފާޅުކޮށްފައިވާއިރު، އަންހެންމީހާ ނިޔާވެފައިވަނީ އިތުރު ފަރުވާއަށް މާލެ ގެންދިޔުމަށް އެއާޕޯޓަށް ވެސް ގެންދިޔަ ފަހުންނެވެ. ދަރިފުޅު ނިޔާވީ މާލެ ގެނައި ފަހުންނެވެ.

ހާދިސާގައި އެއްވެސް ފަރާތެއްގެ އިހުމާލެއްވޭތޯ ޖިނާޢީ ތަހުގީގެއް ހިންގާ، އިހުމާލުވެފައިވާ ފަރާތެއްވާނަމަ އެފަރާތެއް ނުވަތަ ފަރާތްތަކެއްހޯދާ ޤާނޫނީ ފިޔަވަޅު އަޅަނެ ކަމަށް ހޯމް މިނިސްޓާ އަލީ އިހުސާން ވަނީ ވިދާޅުވެފަ އެވެ.