ގާމަގު ކެފޭ ހުންނަ އިމާރާތުގައި ހޯމަ ދުވަހުގެ މެންދުރު ހިނގި އަލިފާނުގެ ހާދިސާގައި 57 މީހަކު ހާލުގައި ޖެހިފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

އެންޑީއެމްއޭއިން މީގެ ކުރިން ހާމަކުރި ގޮތުގައި އަލިފާނުގެ ހާދިސާގައި ހާލުގައި ޖެހިފައިވަނީ 22 ދިވެހިންނާއި 15 ބިދޭސީންނެވެ.

Ad by Hajj Corporation

ނަމަވެސް އެ އޮތޯރިޓީން އެންމެ ފަހުން އާންމުކުރި ތަފާސްހިސާބުތަކުން ދައްކާގޮތުގައި ހ. ދޫހިމިރި ގޭގައި ހިނގި އަލިފާނުގެ ހާދިސާގައި 37 ދިވެހިންނާއި 20 ބިދޭސީން ހާލުގައި ޖެހިފައިވެއެވެ.

އިއްޔެ މެންދުރު ފަހު 2:47 ހާއިރު ހިނގި އަލިފާނުގެ ހާދިސާގައި 50 ބިދޭސީންނާއި ހަ ދިވެހިން ހިމެނޭ ގޮތަށް 56 މީހަކު ވަނީ އިވެކުއޭޓްކޮށްފައެވެ. އެންޑީއެމްއޭއިން އެންމެ ބޮޑު ސަމާލުކަމެއް ދެނީ ގެދޮރު ގެއްލިފައިވާ މީހުންނަށް ރައްކާތެރި ކަމާއެކު ބޯހިޔާވަހިކަން ހޯދައިދިނުމަށެވެ.

މި ހާދިސާގައި ދެ އަންހެނަކު ހޮސްޕިޓަލުގައި އެޑްމިޓްކޮށްފައިވެއެވެ. އޭގެ ތެރެއިން އެކަކު ހޮސްޕިޓަލުން ދޫކޮށްލާފައިވާއިރު ދެވަނަ މީހާގެ ޙާލު ރަނގަޅު ކަމަށް މަޢުލޫމާތުލިބެއެވެ.

އަލިފާނުގެ ހާދިސާގައި އިމާރާތް މަރާމާތު ނުކުރެވޭ ވަރަށް ބޮޑެތި ގެއްލުންތަކެއް ލިބިފައިވާއިރު ޖެހިގެން ހުރި އިމާރާތްތަކަށް ވެސް ވަނީ އަލިފާނުގެ އަސަރުކޮށްފަ އެވެ. އަލިފާން ނިއްވުމުގައި އަލިފާން ނިއްވާ ފަރާތްތަކަށް ބޮޑެތި ގޮންޖެހުންތަކެއް ކުރިމަތިވެ ބޮޑެތި ގެއްލުންތަކެއްވެސް ލިބުނެވެ.

މިހާދިސާގައި ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ކަމާބެހޭ ފަރާތްތަކުން ދަނީ ކުރަމުންނެވެ.

ރޭ ވެސް އެ ގޭގައި ރޯވެފައިވާ ކަމުގެ މައުލޫމާތު ލިބިގެން އެމްއެންޑީއެފާއި ފުލުހުން ހަރަކާތްތެރިވިއެވެ. ނަމަވެސް އެކަން ބެލުމަށް ފަހު އެމްއެންޑީއެފުން ބުނީ އަލިފާން ރޯވެފައި ނުވާ ކަމަށެވެ.