ކުރިއަށްއޮތް ދިރާސީ އަހަރު ސްކޫލް ބަދަލުކުރަން އެދޭ ދަރިވަރުންނަށް އެކަމަށް އެދި ހުށައެޅުމުގެ ފުރުޞަތު ތަޢުލީމާ ބެހޭ ވުޒާރާއިން ހުޅުވާލައިފިއެވެ. 

މި ފުރުޞަތު ހުޅުވާލާފައިވަނީ އަންނަ މާރިޗުމަހުގެ 6 ވަނަ ދުވަހާއި ހަމައަށެވެ. 

2025ވަނަ އަހަރުގެ ދިރާސީ އަހަރު ފެށެނީ ރަމަޟާން މަހުގެ ފަހު ދިހައިގެ ބަންދު ދުވަސްތަކާއި ފިތުރު ޢީދުގެ ބަންދު ދުވަސްތަކަށްފަހު ކަމަށްވާތީ، ދަރިވަރުން ސްކޫލަށް ވެއްދުމާ ގުޅުން ހުރި ހުރިހާ މަސައްކަތެއްމާރިޗު މަހުގެ 15ގެ ކުރިން ނިންމުމަށް ހަމަޖެހިފައިވާކަމަށް އެޑިއުކޭޝަނުން ވިދާޅުވެއެވެ. 

Ad by Hajj Corporation

އަދި މިދުވަސްވަރަކީ ދަރިވަރުންގެ އިމްތިޙާނާއި އެސެސްމެންޓްތައް އަދި ދަރިވަރުންގެ ރިޕޯޓް ފޯމު ތައްޔާރުކުރާ ދުވަސްވަރަށްވުމުން، މި ހިނގާ ދިރާސީ އަހަރުގެ ބާކީ ދުވަސްކޮޅުގެ ތެރޭގައި ދަރިވަރުން އެއްރަށެއްގެ ސްކޫލުން އަނެއް ރަށުގެ ސްކޫލަށް ބަދަލުވުމުގެ ކަންތައްތައް ކުރިއަށް ނުގެންދާގޮތަށް ހަމަޖައްސާ އެކަން ސްކޫލްތަކަށް އަންގާފައިވާކަމަށް އެޑިއުކޭޝަނުން ވިދާޅުވެއެވެ.

ތަޢުލީމީ ވުޒާރާއިން ވިދާޅުވީ ކުރިއަށް އޮތް ދިރާސީ އަހަރު ފެށުމުގެ ކުރިން، އެކަށީގެންވާ ވަގުތު އޮއްވައި ދަރިވަރުން ސްކޫލުތަކަށް ވެއްދުމުގެ މަސައްކަތް އެވުޒާރާއިން ކުރައްވަމުން ގެންދަވާކަމަށެވެ.

އެގޮތުން އަންނަ ދިރާސީ އަހަރަށް ދަރިވަރުން ކިޔަވަމުންދާ ސްކޫލުން އެހެން ރަށެއްގެ ސްކޫލަކަށް ބަދަލުކުރާނަމަ، އެކަމަށް އެދުމުގެ ފުރުޞަތު މިހާރު ހުޅުވާލާފައިވާކަމަށް ތައުލީމީ ވުޒާރާއިން ވިދާޅުވިއެވެ.