ކުރިއަށް އޮތް ރޯދަ މަހަށް ރައްޔިތުންގެ މަޖިލީހުގެ ޖަލްސަތައް މެދުކަނޑާލާ، މަޖިލީހުގެ މި ދައުރު މި މަހުގެ ނިޔަލަށް ކުރުކޮށްލުމަށް މަޖިލީހުގެ ގަވާއިދަށް އިސްލާހެއް ހުށަހަޅައިފި އެވެ.

ރޯދަމަހަށް މަޖިލީހުގެ ޖަލްސާތައް މެދު ކަނޑާލާ ދައުރު ކުރުކޮށްލަން ހުށަހެޅުއްވީ ރައްޔިތުންގެ މަޖިލީހުގެ ފަންނު ދެކުނު ދާއިރާގެ ޕީއެންސީ މެންބަރު އަބްދުﷲ ރިފާއު އެވެ.

Ad by Hajj Corporation

ރިފާއު ހުށަހެޅުއްވި އިސްލާހުގައި ވަނީ މި އަހަރުގެ ފުރަތަމަ ދައުރު މި މަހުގެ ނިޔަލަށް ނިންމާލައި މި ދައުރު ކުރުކޮށްލުމަށެވެ. މިއަހަރުގެ ފުރަތަމަ ދައުރު ފެށީ މަމަހުގެ 6 ވަނަ ދުވަހު އެވެ. އަދި ކުރިއަށް ހުރި ދައުރުތައް ގަވާއިދުގައިވާ ގޮތުގެ މަތިން ކުރިއަށް ގެންދިއުމަށް ހުށަހަޅާފައިވެ އެވެ. އެ އުސޫލަށް އަމަލު ކުރެވޭނީ ހަމައެކަނި މިއަހަރުގެ ފުރަތަމަ ދައުރަށް ކަމަށްވެސް މެމްބަރު ވިދާޅުވި އެވެ.

މި އިސްލާހު އިތުރަށް ދިރާސާކުރުމަށް މިއަދު ވަނީ މަޖިލީހުގެ އާންމު ކޮމެޓީއަށް ފޮނުވާފަ އެވެ.

މިއިސްލާހު ހުށަހެޅުއްވީ މެމްބަރުންނަށް ރޯދަ މަހު ލިބޭނެ ވަގުތު ކުޑަ ވުމުންކަމަށް ރިފާއު ވިދާޅުވި އެވެ. އަދި މިގޮތަށް އިސްލާހު ހުށަހެޅުއްވީ ޕީޖީ ގުރޫޕުގައި މަޝްވަރާ ކުރެއްވުމަށްފަހު ކަމަށްވެސް މެމްބަރު ވިދާޅުވި އެވެ.

ރައްޔިތުންގެ މަޖިލީހުގެ ދައުރު ބެހުގެން ވަނީ ތިން ދައުރަކަށެވެ. ފުރަތަމަ ދައުރު ފަށާފައި ވަނީ މިމަހުގެ 6 ވަނަ ދުވަހު އެވެ. މެމްބަރުންގެ ޗުއްޓީއަށް ފަހު ދެވަނަ ދައުރު ފެށުމަށް ހަމަޖެހިފައި ވަނީ 1 ޖޫން އިން 15 އޮގަސްޓްގެ ނިޔަލަށް އަދި ތިން ވަނަ ދައުރު ފެށުމަށް ހަމަޖެހިފައި ވަނީ 1 އޮކްޓޫބަރުން ނޮވެމްބަރުގެ ނިޔަލަށެވެ. ނަމަވެސް މި ތާރީހުތަކަށް ބަދައު އައުމަކީ އެކަށީގެންވާ ކަމެކެވެ.