ސިޔާސީ ޕާޓީތަކަށް މީހުން ވެއްދޭނީ އިލެކްޝަންސް ކޮމިޝަން (އީސީ)ގެ ޕޯޓަލް މެދުވެރިކޮށް ކަމަށް ކަނޑައަޅައި ސިޔާސީ ޕާޓީގެ ގަވާއިދު އިސްލާހުކޮށް އިލެކްޝަންސް ކޮމިޝަނުން އާއްމުކޮށްފިއެވެ.

އޮޅުވާލައިގެން ސިޔާސީ ޕާޓީތަކަށް މީހުން ވައްދާ މައްސަލަ ބޮޑުވެ، މައްސަލަ ހައްލުކުރުމަށް އީސީން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން މިއަދު އާއްމުކުރި ގަވާއިދުގައިވާގޮތުން ސިޔާސީ ޕާޓީއެއް އުފައްދަން ހުއްދައަށް އެދޭ ދުވަހުން ފެށިގެން 3 މަސްދުވަހުގެ ތެރޭގައި މަދުވެގެން 3،000 މީހުންގެ މައުލޫމާތާއި މިހާރު ހުރި ޕާޓީތަކަށް މެމްބަރުން އިތުރުކުރުމަށް އެ ކޮމިޝަނުގެ 'ސިމެދަ' ޕޯޓަލް މެދުވެރިކޮށް ހުށަހެޅޭނެ ކަމަށެވެ. މި ޕްލެޓްފޯމަށް އީ-ފާސް މެދުވެރިކޮށް ސިޔާސީ ޕާޓީތަކަށް ރެޖިސްޓްރީވެވޭނެއެވެ.

Ad by Hajj Corporation

ޕާޓީތައް ދަފުތަރުކުރުމަށް ހުށަހަޅާ މެމްބަރުންގެ މައުލޫމާތު ސިޔާސީ ޕާޓީތަކުން 10 އަހަރު ވަންދެން ބަލަހައްޓަން ޖެހޭ ކަމަށް ގަވާއިދުގައި ބުނާއިރު، ޕޯޓަލް މެދުވެރިކޮށް ޕާޓީގެ ދަފުތަރު ކުރުމަށް ހުށަނޭޅޭ ހާލަތެއްގައި އެކަމަށް އީސީން ގޮތެއް ކަނޑައަޅަން ޖެހޭ ކަމަށް ވެސް ގަވާއިދުގައިވަނީ ބަޔާންކޮށްފައެވެ.

ގަވާއިދުގައިވާ ގޮތުން އަލަށް ސިޔާސީ ޕާޓީގެ މެންބަރަކަށް ވުމަށް އެދޭ ފަރާތްތަކުން އީފާސް މެދުވެރިކޮށް ހުށަހަޅާއިރު، ޑިޕާޓްމަންޓް އޮފް ނޭޝަނަލް ރެޖިސްޓްރޭޝަނުގައިވާ އެ ފަރާތުގެ މައުލޫމާތު، އިލެކްޝަންސް ކޮމިޝަނުން ބޭނުންވެއްޖެ ހިނދެއްގައި ހޯދުމަށް އިއުތިރާޒު ނުކުރާކަމުގައި އިޤުރާރުވާންވާނެއެވެ.

އޮޅުވާލައިގެން ސިޔާސީ ޕާޓީތަކަށް މީހުން ވައްދާ މައްސަލަ ބޮޑުވެފައިވަނިކޮށް އީ-ފާސް މެރުވެރިކޮށް ޕާޓީތަކުގެ ދަފްތަރުގައި ރެޖިސްޓްރީވުމަށް އެދި ހުށައެޅޭ ގޮތް ހެދުމުން މި މައްސަލައަށް ދާއިމީ ހައްލެއް ލިބިގެންދާނެކަމަށް ކޮމިޝަނުންވަނީ ވިދާޅުވެފައެވެ.