ރަސްމީ ދަތުރުފުޅެއްގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާނު ޗައިނާއަށް ވަޑައިގަންނަވައިފިއެވެ.

ވަޒީރު ޗައިނާއަށް ވަޑައިގެންނެވީ އެގައުމުގައި ބާއްވާ ގްލޯބަލް ސެކިއުރިޓީ ކޯޕަރޭޝަންގައި ބައިވެރިވެވަޑައިގަތުމަށް ޗައިނާގެ ޕަބްލިކް ސެކިއުރިޓީ ވަޒީރު ވަންގް ޝިއަހޮންގެ ދަޢުވަތަކަށެވެ.

އެ ދަތުރުގެ މައުލޫމާތު ދެމުން ދާޚިލީ ސަލާމަތާ ބެހޭ ވުޒާރާއިން ބުނީ، ވަޒީރުގެ އެ ދަތުރުފުޅުގައި ޗައިނާ އަދި ރާއްޖޭގެ ގުޅުން އިތުރަށް ބަދަހިކުރުމަށް މަޝްވަރާކުރާނެ ކަމަށެވެ. އެ މަޝްވަރާތަކުގެ ތެރެއިން ދިވެހި ފުލުހުންގެ ޚިދުމަތުގެ ގާބިލުކަން އިތުރުކުރުމަށް ކުރެވޭނެ މަސައްކަތްތަކާ ބެހޭ ގޮތުން ދެ ބޭފުޅުން މަޝްވަރާކުރައްވާނެ ކަމުގައި އެ ވުޒާރާއިން ބުންޏެވެ.

ވަޒީރު ބައިވެރިވެވަޑައިގަންނަވާ ގްލޯބަލް ސެކިއުރިޓީ ކޯޕަރޭޝަންގައި ޖުމްލަ 122 ގައުމެއްގެ 2،000 އަށް ވުރެ ގިނަ މަންދޫބުން ބައިވެރިވެއެވެ.