ދިފާޢީ ދާއިރާއިން އެއްބާރުލުން އިތުރުކުރުމާ ގުޅޭގޮތުން އިންޑިއާއާއެކު މަޝްވަރާކޮށްފިއެވެ.

މި މަޝްވަރާތައް ކުރިއަށްދިޔައީ މިނިސްޓަރ އޮފް ސްޓޭޓް ފޮރ ޑިފެންސް މުޢާޛު ޙަލީމް އިންޑިއާގެ ޔޫނިއަން މިނިސްޓަރ އޮފް ސްޓޭޓް ފޮރ ޑިފެންސް ސަންޖޭ ސެތްއާ ބައްދަލުކުރައްވައި ކުރެއްވި މަޝްވަރާތަކުގެ ތެރެއިންނެވެ.

މިހާރު އިންޑިއާގައި ކުރިއަށްދާ "އެއިރޯ އިންޑިއާ 2025"ގެ ހަވާސާގައި ބޭއްވި މި ބައްދަލުވުމުގައި، ދިވެހިރާއްޖެއާއި އިންޑިއާ ގުޅިގެން ދިފާޢީ ދާއިރާއިން އެއްބާރުލުން އިތުރުކުރުމާ ގުޅޭގޮތުން މަޝްވަރާކުރެއްވިކަމަށް ދިފާއީ ވުޒާރާއިން ހާމަކުރެއެވެ.

ވުޒާރާއިން ބުނީ މި ބައްދަލުވުމުގައި، ސްޓޭޓް މިނިސްޓަރ މުޢާޒު ޙަލީމާއި އިންޑިއާގެ ޔޫނިއަން މިނިސްޓަރ އޮފް ސްޓޭޓް ފޮރ ޑިފެންސްގެ އިތުރުން، ޤައުމީ ދިފާޢީ ބާރުގެ ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު ޣިޔާޘްއާއި ޤައުމީ ދިފާޢީ ބާރުގެ މެރިން ކޯރގެ ކޮމަޑާންޓް، ބްރިގޭޑިއަރ ޖެނެރަލް ޢަބްދުﷲ ޒުހުރީއާއި ދިވެހިރާއްޖެއިން އިންޑިއާއަށް ކަނޑައަޅުއްވާފައިވާ ޑިފެންސް އެޑްވައިޒަރ، ކާނަލް އަމާނުﷲ އަޙްމަދު ރަޝީދު ބައިވެރިވެވަޑައިގެންނެވިކަމަށެވެ.