މާލޭގެ ރަސްފަންނުގެ މޫދަށް އެރޭ ސަރަޙައްދު ޢާންމުންނަށް ވަގުތީ ގޮތުން ބަންދުކޮށްފިއެވެ.

މާލޭ ސިޓީ ކައުންސިލުން މިއަދު އިއުލާނުކުރި ގޮތުގައި މި ފިޔަވަޅު އަޅާފައިވަނީ އެ ސަރަޙައްދުގައި ކިސަޑު ޖަމާވެފައިވާކަން ފާހަގަކުރެވުމާ ގުޅިގެންނެވެ.

ކައުންސިލުން ހާމަކުރި ގޮތުގައި ރަސްފަންނުގެ މޫދަށް އެރޭ ސަރަޙައްދުގެ 500 އަކަ މީޓަރުގެ ބޮޑުމިނުގެ ސަރަޙައްދެއްގައި އެއް ފޫޓުގެ ފުންމިނަށް ކިސަޑު ޖަމާވެފައިވާކަން ވަނީ ފާހަގަކުރެވިފައެވެ.

މި މައްސަލަ ޙައްލުކުރުމަށްޓަކައި، އެ ސަރަޙައްދުން ކިސަޑު ނަގައި، ބީޗަށް ވެލި އެޅުމުގެ މަސައްކަތް މާދަމާ ހެނދުނު 9 ޖަހާއިރު ފެށޭނެ ކަމަށް ސިޓީ ކައުންސިލުން ވަނީ އިއުލާނުކޮށްފައެވެ.

މި މަސައްކަތް ފެށި ކުރިއަށްދާ މުއްދަތުގައި، މަސައްކަތް ނިމެންދެން ރަސްފަންނުގެ މޫދަށް އެރޭ ސަރަޙައްދު އާންމުންނަށް ބަންދުވާނެ ކަމަށް ސިޓީ ކައުންސިލުން ވަނީ އަންގާފައެވެ. ނަމަވެސް މަސައްކަތް ނިމޭނެ ވަކި ތާރީޚެއް އަދި ހާމަކޮށްފައެއް ނުވެއެވެ.