ޤާނޫނުއަސާސީ އިސްލާހުކުރުމުގެ ބާރު އޮންނަންވާނީ ރައްޔިތުންގެ މަޖިލީހަށް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު ޝޯސަލް މީޑިއާގައި ލިޔުއްވި ގޮތުގައި އެ މަނިކުފާނަށް ލަފާކުރެވިފައި އޮންނަ ގޮތުގައި ޤާނޫނު އަސާސީ އިސްލާހް ކުރެވޭނީ ރައްޔިތުންގެ މަޖިލީހަށެވެ.

Ad by Hajj Corporation

ނަޝީދު ވިދާޅުވި ގޮތުގައި، ޤާނޫނުއަސާސީ ބަދަލުކުރާނަމަ ފެންނަ ނުފެންނަ ވޯޓެއް ނަގަން ޖެހޭނެއެވެ. އަދި ޤާނޫނުއަސާސީ ބަދަލުކުރުމުގެ ބާރު އޮންނަންވާނީ ސީދާ ރައްޔިތުންނަށް ކަމަށް ވެސް ވިދާޅުވިއެވެ.

މި މައްސަލައާ ގުޅިގެން، ގާނޫނުއަސާސީއަށް މިދިޔަ އަހަރު ގެނައި އިސްލާހު ބާތިލްކުރުމަށް ކެންދޫ ދާއިރާގެ ކުރީގެ މެމްބަރު އަދި ވަކީލް އަލީ ހުސައިން ސުޕްރީމް ކޯޓަށް މައްސަލައެއް ހުށަހަޅުއްވާފައިވެއެވެ. މި މައްސަލައަށް ތަދައްހުލުވުމަށް އެމްޑީޕީގެ އިތުރުން ޑިމޮކްރެޓްސް ޕާޓީން ވެސް ހުށަހަޅާފައިވެއެވެ.

އެހެންނަމަވެސް، ޑިމޮކްރެޓްސް ޕާޓީން މި މައްސަލައިން ބޭރުވެފައިވާއިރު، އެ ޕާޓީގެ ރައީސް އިމްތިޔާޒު ފަހުމީ ވަނީ މި މައްސަލަ ސުޕްރީމް ކޯޓަށް ނުބެލޭނެ ކަމަށް ދާދިފަހުން ވިދާޅުވެފައެވެ.