ރ. ފައިނުގައި ތަރައްގީ ކުރަން ނިންމާފައިވާ އެއާޕޯޓުގެ މަސައްކަތްތައް ފެށުމުގެ ކުރިން ހަދަންޖެހޭ އެސެސްމަންޓުތައް ހެދުމަށް އެމްޓީސީސީ އާއި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އާ ދެމެދުެމެދު އެއްބަސްވުމެއްގައި މިއަދު ސޮއިކޮށްފިއެވެ.

މިއަދު ހެނދުނު ބޭއްވުނު ހާއްސަ ހަފްލާއެއްގައި މި އެއްބަސްވުމުގައި ސޮއިކުރެވުނެވެ. އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުޙައްމަދެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހްމަދު ސައުދީއެވެ. މި ހަފްލާގައި އިނގުރައިދޫ ދާއިރާގެ މެންބަރު އިބްރާހިމް ފަލާހު ވެސް ބައިވެރިވެވަޑައިގެންނެވިއެވެ.

Ad by Hajj Corporation

މަޝްރޫއުގައި ސޮއިކުރުމަށް ފަހު އެމްއޭސީއެލް އިން 'އެކްސް' ގައި ކުރި ޕޯސްޓެއްގައި ބުނެފައިވަނީ މި މަޝްރޫއަކީ ރައީސް މުހައްމަދު މުއިއްޒުގެ ތަސައްވަރާ އެއްގޮތަށް، ރާއްޖޭގެ ދަތުރުފަތުރުގެ ނިޒާމު ހަރުދަނާކޮށް އިގްތިސާދީ ކުރިއެރުމަށް މުހިއްމު މަޝްރޫއެއް ކަމަށެވެ.

މީގެ ކުރިން، މިދިޔަ މަހުގެ 23 ވަނަ ދުވަހު ރ. ފައިނަށް ވަޑައިގެން ރައީސް މުއިއްޒު ވަނީ ވަރަށް އަވަހަށް އެ ރަށުގައި އެއާޕޯޓުގެ މަސައްކަތް ފެށޭނެ ކަމުގެ ޔަގީންކަން ދެއްވާފައެވެ. އަދި ފައިނު އެއާޕޯޓަކީ އެ ރަށު ރައްޔިތުންނާއި އެ ދާއިރާގެ ރައްޔިތުންގެ ވެސް އިގްތިސާދީ ކުރިއެރުމުގައި މުހިއްމު ދައުރެއް އަދާކުރާނެ އެއާޕޯޓެއް ކަމަށް ވެސް ރައީސް މުއިއްޒު ވަނީ ވިދާޅުވެފައެވެ.

"ވަރަށް ގިނަ ވަޒީފާތައް އޭގެ ސަބަބުން އުފެދިގެންދާނެ. މި ސަރަހައްދަށް ގިނަ ރިސޯޓުތަކެއް އައުމަށް މަގުފަހުވެގެންދާ ކަމަކަށް މިކަން ވެގެންދާނެ،" ރައީސް މުއިއްޒު ވިދާޅުވިއެވެ. އަދި ފައިނު އެއާޕޯޓު ވެގެންދާނީ އުއްމީދީ އެއާޕޯޓަކަށް ކަމަށް ވެސް ރައީސް ވިދާޅުވެފައިވެއެވެ.