ގެދޮރުވެރިޔާ ސްކީމުގެ ދަށުން ހުޅުމާލޭގައި އިމާރާތް ކުރަމުން އަންނަ 4،000 ފްލެޓް ލިބޭ މީހުންގެ ލިސްޓް އިއްޔެ އާންމުކުރިއިރު، ރައީސް ޑރ. މުހައްމަދު މުޢިއްޒުގެ ސަރުކާރުގެ އިންސާފުވެރިކަން ވަރަށް ބޮޑަށް ފާހަގަކުރެވިގެން ދިޔައެވެ. މި ލިސްޓަކީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހު ދުވަސްކޮޅު ނެރުނު ލިސްޓުގައި ހުރި މައްސަލަތަކާ ގުޅިގެން، އެންޓިކޮރަޕްޝަން ކޮމިޝަން (އޭސީސީ)ގެ އިރުޝާދާއެކު މި ސަރުކާރުން ވެރިފިކޭޝަން ކުރުމަށްފަހު ނެރުނު ލިސްޓެކެވެ.

މި އައު ލިސްޓުގައި ފާހަގަކުރެވޭ އެންމެ މުހިންމު ކަމަކީ، އެމްޑީޕީގެ ބޮޑުންނާއި، އެކްޓިވިސްޓުންނާއި ސަޕޯޓަރުންނަށް ފްލެޓެއް ޝަރުތާއި އުސޫލާއި އެއްގޮތަށް ލިބިފައިވާނަމަ އެ މީހުންގެ ނަން ލިސްޓުން އުނި ނުކުރުމެވެ. ނަމަވެސް، ނުހައްގުން ޝަރުތު ހަމަނުވާ، އުސޫލުން ބޭރުން އެ ލިސްޓަށް އެރުވި ނަންތައް އުނިކޮށް، އުނިވި ސަބަބުވެސް ވަނީ ބަޔާންކޮށްދީފައެވެ. މީގެ އިތުރުން، އެމީހުންނަށް ފްލެޓް ޙައްޤުވާކަން ސާބިތުކޮށްދިނުމަށް ޝަކުވާ ހުށަހަޅަން އެއްމަސް ދުވަސް ވެސް ވަނީ ދީފައެވެ.

މި އައު ލިސްޓުގައި ފްލެޓް ލިބޭ ކަމަށް ކަނޑައަޅާފައިވަނީ 1،820 މީހުންނެވެ. މީގެ ތެރެއިން ތިން ކޮޓަރީގެ ފްލެޓް ލިބޭ މީހުންގެ ތެރެއިން ޝަރުތު ހަމަވަނީ 1،423 މީހުންނެވެ. އަދި ދެ ކޮޓަރީގެ ފްލެޓަށް ޝަރުތު ހަމަވަނީ 397 މީހުންނެވެ.

2،695 މީހެއްގެ ފޯމް ޝަރުތު ހަމަނުވާ ކަމަށް ކަނޑައަޅާފައިވެއެވެ. އަދި 424 ފަރާތެއްގެ ޕޮއިންޓުތަކަށް އައި ބަދަލާ އެކު ފްލެޓް ލިބޭ މީހުންގެ ލިސްޓުން އެމީހުން އުނިވެފައިވެއެވެ.

ވެރިފިކޭޝަން ކުރިއަށް ދިޔައީ ޕޯޓަލްގެ ތެރެއިން

މި ލިސްޓް ނެރުމުގެ ކުރިން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރު ޑރ. އަބްދުﷲ މުއްތަލިބު މައުލޫމާތުދެއްވި ގޮތުގައި، ވެރިފިކޭޝަން ކުރިއަށް ދިޔައީ ޕޯޓަލްގެ ތެރެއިންނެވެ. އެހެންވެ، ހުށަހަޅާފައިވާ އެއްވެސް މައުލޫމާތެއް ލިޔެކިޔުމުގެ ބަދަލުކުރުމުގެ ފުރުސަތު އެއްވެސް ފަރާތަކަށް ލިބިފައިނުވާނެކަން މިނިސްޓަރު ފާހަގަކުރެއްވިއެވެ. އަދި ފޯމު ހުށަހެޅި ފަރާތަށް ވެސް ފޯމު ބަދަލުކުރުމުގެ ފުރުސަތު ލިބިފައިނުވާނެކަން ވެސް ފާހަގަކުރެއްވިއެވެ.

އެންމެ ބޮޑު މައްސަލައަކީ ފްލެޓު ހޯދުމަށް ހުށަހަޅާފައިވާ ލިޔެކިޔުންތައް

މުއްތަލިބު ވިދާޅުވި ގޮތުގައި ފްލެޓު ލިސްޓުގައި އޮތް އެންމެ ބޮޑު މައްސަލައަކީ ފްލެޓު ހޯދުމަށް ހުށަހަޅާފައިވާ ލިޔެކިޔުންތަކުގެ މައްސަލަ އެވެ. މިސާލަކަށް މާލޭގައި 15 އަހަރު އުޅުން ކަމަށް ދެއްކުމަށް ކައުންސިލުތައް މެދުވެރިކޮށް ލިޔުން ހޯދާފައިވާ ބައެއް ފަރާތްތަކަކީ މާލޭގައި އެ މުއްދަތުގައި ނޫޅޭ ފަރާތްތައްކަން ދެނެގަނެވިފައިވާއިރު، ގެދޮރުވެރިޔާ ސްކީމަށް ހުށަހެޅި ގިނަ ފަރާތްތަކަކީ ރަށްރަށުން މާލެ އައިސް ފަހުން ރަޖިސްޓްރީވި ފަރާތްތަކާއި އަދި މާލެއަށް ހިޖުރަކޮށް މާލޭގައި ދިރިއުޅޭ ފަރާތްތައްކަން މިނިސްޓަރު ފާހަގަކުރެއްވުއެވެ. އެކަމަކު މާލޭގައި އުޅޭކަން ސާބިތުކުރުމަކީ ގިނަ ފަރާތްތަކަށް ކުރަންޖެހިފައި އޮތް ކަމެއް ކަމަށާއި، 2007 އަކުން ފެށިގެން މާލޭގައި އުޅޭކަމަށް ދެއްކުމަކީ އެކަމުގައި ކަނޑައަޅާފައިވާ އެންމެ އަސާސީ އެއް ޝަރުތުކަން މިނިސްޓަރު ފާހަގަކުރެއްވިއެވެ.

މާލޭގައި އުޅުންކަން ސާބިތުކޮށްފައި ވަނީ މާލޭގެ ގެތަކުން ދީފައިވާ ލިޔުންތަކާއި ކައުންސިލުން ހެކި ދީގެން ކަަމަށް އޭނާ ވިދާޅުވި އެވެ. އަދި އެއްވެސް ލިޔުމެއް ނެތްއިރު ވެސް، 8 ޕަސެންޓް މީހުން ފްލެޓް ލިބޭ ލިސްޓަށް އަރުވާފައިވާ ކަމަށް މިނިސްޓަރު ފާހަގަކުރެއްވިއެވެ. އެކަން ކަށަވަރު ކުރުމަށް ސަރުކާރުގެ އިދާރާތައް މެދުވެރިކޮށް ބެލެން އޮތް މިންވަރަކަށް ބަލާފައިވާކަމަށް މިނިސްޓަރު ވަނީ ވިދާޅުވެފައެވެ.

އެހެންއެކަން އޮތަސް ބެއްލެވީ ވީއެންމެ ބޮޑަކަށް ދޫދީގެން، ވީހާވެސް ގިނަ ފަރާތެއް ފްލެޓް ލިބޭ ލިސްޓުގައި ހިމެނުމަށް ކަމަށް މިނިސްޓަރު ވިދާޅުވިއެވެ.

ތާރީޚްގައި ވެސް އެއްވެސް ނުފޫޒެއް ނުފޯރުވާ ފުރަމަ ލިސްޓް

މާލޭގެ ޢިއްޒުއްދީން ފާލަން ހުޅުވަން ރޭ ބޭއްވި ރަސްމިއްޔާތުގައި މި ފްލެޓްތަކާއި ބެހޭގޮތުން ވާހަކަފުޅު ދައްކަވަމުން ރައީސް ޑރ. މުޙައްމަދު މުޢިއްޒު ވަނީ މި ލިސްޓަށް ސަރުކާރުގެ ނުފޫޒު އެއްވެސް މިންވަރަކަށް ނުފޯރުވާކަމުގެ ޔަގީންކަން ދެއްވާފައެވެ.

މިގޮތުން މިހާރު ފަށާފައި ނިމެމުންދާ 4000 ފްލެޓް ލިބޭ މީހުންގެ ލިސްޓް އިޢުލާނުކޮށްފައިވާކަން ފާހަގަކުރައްވައި، ރައީސް ވިދާޅުވީ، އެ ލިސްޓަކީ ''މިދިޔަ ސަރުކާރުން އިޢުލާނުކުރި ލިސްޓުގައި ހުރި އެކިއެކި މައްސަލަތައް ބަލައި، އޭ.ސީ.ސީ.އިން ފާހަގަކޮށްފައި ހުރި ކަންކަން ބަލައި، އެ ސަރުކާރުން އިޢުލާނުކުރި ޝަރުޠުތަކަށް ޕޮއިންޓް ދޭނެ އުޞޫލާއި، މި ހުރިހާ ކަމަކަށް އަލިއަޅުވާލައިގެން، އޭގައި ހުރި ގޮތަށް ބަލައި'' ނެރެފައިވާ ލިސްޓެއް ކަމަށެވެ.

''އަޅުގަނޑު ވަޢުދުވިން، އެ މީހަކަށް، އެ ރައްޔިތަކަށް ލިބިފައ އޮތް ގޯއްޗެއް، ފްލެޓެއް އަތުނުލާނެ ކަމަށް. އެ ވަޢުދުގެ މަތީގައި އެ ދުވަހުވެސް، މިއަދުވެސް އަދި މާދަންވެސް އަޅުގަނޑު ހުންނާނީ. ލިސްޓު ނުކުތްއިރުގައި، ކުރީ ސަރުކާރުން ނެރުނު ލިސްޓުން މަދުވެއްޖެ ބަޔަކު. އޭގެ ސަބަބުތައް އެ ލިސްޓު އިޢުލާނު ކުރެވިފައިވާއިރުގައި، އެއިން އުނިވި، ނޫނީވިއްޔާ ނުހޮވުނު ކޮންމެ މީހެއްގެ މަޢުލޫމާތުތެރޭގައި ހިމެނިފައިވާނެ. އަޅުގަނޑު ހަމަ ޔަޤީންކަމާއެކީ އިރާދަކުރެއްވިއްޔާ ދޭ ޔަޤީންކަމެއް މިއީ، އެންމެ ބޮޑު ޔަޤީންކަމަކީ، މި ލިސްޓު ހެދުމުގައި ޒައްރެއްގެ މިންވަރުގެ ނުފޫޒެއްވެސް ފޯރުވާފައި، އެއްވެސް ފަރާތަކުން ނުވާނެކަން. މިއީ ނުފޫޒުން އެއްކިބާވެގެން ނެރެފައިވާ ލިސްޓެއް. މިއީ ރާއްޖޭގައި އަޅުގަނޑު ހިތުން އަޅުގަނޑަށް ހަމަ ޔަޤީނުންވެސް ގެދޮރުވެރިކަމުގެ ދާއިރާގެ އެކި ކަންތައްތަކުގެ މަޢުލޫމާތު އެނގެން ފެށި ހިސާބުން އަދި އެކިއެކި ހައިސިއްޔަތުތަކުން އެންމެ ޖޫނިއަރ ލެވެލްއިން ފެށިގެން ސަރުކާރުގެ މި ކަމާބެހޭ ދާއިރާގައި އުޅެން ފެށި ހިސާބުން ބެއްޔަސް، ނުފޫޒެއް ނުފޯރުވައި، ހައުސިންގ، ގެދޮރު ލިބޭނެ މީހުންގެ ލިސްޓެއް ނުކުތް ފުރަތަމަ ފަހަރު. ނުފޫޒެއް ނޯންނާނެ މި ލިސްޓަކު.'' ރައީސް ރޭ ވިދާޅުވެފަވެއެވެ.

ޝަކުވާ ހުށަހަޅަން 30 ދުވަސް، ގަސްދުގައި މީހަކު އުންޏެއް ނުކުރޭ

މި ލިސްޓާއި ގުޅިގެން ރައީސް ދެއްކެވި ވާހަކަފުޅުގައި އެ ލިސްޓަށް އެއްވެސް ނުފޫޒެއް ނެތްކަމުގެ ޔަޤީންކަން ދިވެހި ހުރިހާ ލޮބުވެތި ރައްޔިތުންނަށް އަރުވަމުން، ވަކިން ޚާއްޞަކޮށް، މި ލިސްޓާ ގުޅިފައިވާ ރައްޔިތުންނަށް އެ ޔަގީންކަން ދެއްވާކަމަށް ވަނީ ވިދާޅުވެފައެވެ.

'' އެކި ސަބަބުތަކާ ހެދި ލިސްޓަށްނޭރި ރައްޔިތުންނަށް އަޅުގަނޑު ދަންނަވާލަން ބޭނުންވަނީ، އެއްވެސް ސަބަބަކާހުރެ ލިސްޓުގައި ނުހިމެނެންޏާ، އެކަން އޮޅުންފިލުއްވުމަށް، ނޫނީވިއްޔާ ޝަކުވާއެއްވިޔަސް، މައްސަލައެއް ގޮތުގައިވިޔަސް ހުށަހެޅުމުގެ ފުރުޞަތު، 30 ދުވަހުގެ ފުރުޞަތު އެވަނީ މިހާރު ހުޅުވާލެވިފައި. ރަމަޟާން މަސް ނިމެންދެން އެ ފުރުޞަތު އޮންނާނެ. ކަމާބެހޭ ވުޒާރާއިން އެކަން އިވެލުއޭޓް ކުރުމުގެ ތެރެއިން، ބެލުމުގެ ތެރެއިން އެއްވެސް ކަމެއް އުނިވެފައިވާނަމަ، ނޫނީވިއްޔާ ބެލުމުގައި ކިރިޔާވެސް ކަމެއް ނުބެލިވާ ކަމަށް ގަބޫލުކުރެއްވޭނަމަ، އެ ބޭފުޅަކަށް ގަބޫލުކުރެއްވޭނަމަ، މައްސަލަ ހުށަހަޅުއްވައި ދެއްވާށޭ. ހަމަ ޔަޤީނުންވެސް ގަސްދުގައި އެއްވެސް މީހަކު ލިސްޓަކުން އުނިކޮށްފައެއް ނުވާނެ.'' ރައީސް ވިދާޅުވެފަވެއެވެ.

ރައީސް ވިދާޅުވިގޮތުގައި މި ސަރުކާރަކީ ދިވެހި ހުރިހާ ރައްޔިތުންނަށް، އެ ރައްޔިތެއްގެ ޙައްޤުތައް އަދި އޭގެއިތުރަށްވެސް ކަންކަން ފުރިހަމަކޮށްދިނުމުގައި އިންތިހާއަށް ޝައުޤުވެރިކަން ހުރި، ލޯތްބާއި ކުލުނާއެކު ހަމަހަމަކަމާއި، އިންޞާފުވެރިކަމާއި ޢަދުލުވެރިކަމާ އެކީގައި ކޮންމެ ރައްޔިތަކަށް ޚިދުމަތް ކުރަން އައި ސަރުކާރެކެވެ.

'' އެހެންވީމާ، މީހަކަށް ލިބިފައި އޮތް އެއްޗެއް އަދި އަމުދުން އަތުލާނެ ސަރުކާރެއް ނޫން. އެކަމުގެ ޝައުޤުވެރިކަން އޮތް ސަރުކާރެއް ނޫން. އެހެންވީމާ، ގަސްދުގައެއް ނޯންނާނެ، އެއްވެސް މީހަކު ލިސްޓުން އުނިކޮށްފައެއް. އަދި އަމުދުން ނުފޫޒެއް ފޯރުވާފައެއް ނޯންނާނެ.'' ރައީސް ވިދާޅުވެފައިވެއެވެ.

ރައީސް ވިދާޅުވިގޮތުގައި ލިސްޓް އަލުން ވެރިފިކޭޝަން ހެދުއިރު ބަލާފައި ވަނީ ވެސް މިދިޔަ ސަރުކާރުން އިޢުލާނުކުރި ޝަރުޠުތަކާއި، ޕޮއިންޓްދޭ ގޮތާއި، އުސޫލުތަކާ އެކަނި ކަމަށެވެ.

'' އަދި އޭ.ސީ.ސީ.އިން އެ ކަނޑައެޅި ކަންކަމާ. އެހެންވީމާ، އެއިން އުނިވެފައިވާ ފަރާތްތައް، މި ދެންނެވި ގޮތަށް ހުށަހެޅީމާ، އަލުން ބަލައި، އެއްވެސް ސަބަބަކާ ހެދި އުނިވެފައިވާ ކަމަށް އެ ފަރާތަކަށް ގަބޫލުކުރެވޭނަމަ، ނޫނީވިއްޔާ ސާބިތުވާނަމަ ހަމަޖެހިގެންދާނެ. އެހެންވީމާ، 30 ދުވަސް އެބައޮތް. މި ސްކީމަށް ކުރިމަތިލީ މީހުންގެ ތެރެއިން، އަދިވެސް ސޯޅަވަރަކަށް ހާސް މީހުން މި ލިސްޓުގައި އެބައުޅޭ، ކުރިމަތިލީ މީހުންގެ ތެރެއިން ނުހޮވި. މިދިޔަ ސަރުކާރުން އެ އިޢުލާނުކުރި ޝަރުޠުތަކާއި ޕޮއިންޓްދޭ ގޮތާއި، މި ހުރިހާ އެއްޗަކަށް ބަލައިގެން ޕޮއިންޓް ދީގެން، އެންމެ މަތިން ޕޮއިންޓް ލިބޭ މީހުންގެ ތެރެއިން އެ ލިސްޓުން، އެ 4000 ފުލެޓުގެ ތެރެއިން ބާކީވާ ފުލެޓެއް ހުރެއްޖިއްޔާ އެ ތަރުތީބުން ހަމަޖެހިގެންދާނެ.'' ރައީސް ވިދާޅުވެފަވެއެވެ.

އެއްވެސް އާކަމެއް ނުގެންނާނެ

ރައީސް ވިދާޅުވިގޮތުގައި މި ސަރުކާރުން ''މީގެ އެއްވެސް ކަމެއްގެ ތެރެއަކަށް އާކަމެއް ނުގެންނާނެ'' އެވެ.

''ވަރަށް ދެފުށް ފެންނަ، ވަރަށް ޢަދުލުވެރިކަމާއި، އިންޞާފުވެރިކަމާއެކު ގެންދާނީ. ހަމައެއާއެކީގައި، މި ލިސްޓަށް ނޭރިޔަސް، އެއްގޮތަކަށްވެސް މާލޭގެ ރައްޔިތުން ކަންބޮޑުވެލައްވާކަށް ނުޖެހޭނެ. އެއީ، މި ދެންނެވި ފަދައިން، މި އަހަރު ތެރޭގައި މާލޭގައި، ހުޅުމާލޭގައި، އެތައްހާސް ހައުސިންގ ޔުނިޓުތަކެއްގެ މަސައްކަތް ފަށަން މިއޮތީ ނިންމާފައި. އަދި ވިލިމާލޭގައި، ގުޅީފަޅުގައި އެތައްހާސް ހައުސިންގ ޔުނިޓެއްގެ މަސައްކަތް ފެށިގެންދާނެ. އަދި އިރާދަކުރެއްވިއްޔާ ގިރާވަރުފަޅު ހިކިގެންދިޔައިމާ، އެ ތަނުގައިވެސް ހައުސިންގ މަޝްރޫޢުތައް ކުރިއަށްދާނެ. އަދި މިއަހަރު އަޅުގަނޑުމެން ފަށާ އުތުރުތިލަފަޅުގެ ބިންހިއްކުމުގެ މަޝްރޫޢު ނިމިގެންގޮސް، އެ ތަނުގައިވެސް ހައުސިންގ ޔުނިޓު އެޅުމުގެ މަސައްކަތް ކުރިއަށްދާނެ. އަދި ރަސްމާލޭގެ މަޝްރޫޢު ނިމިގެންދާއިރު، އެތަނުގައިވެސް ހައުސިންގ ޔުނިޓް އެޅިގެންދާނެ. އަދި ގޯތިވެސް ލިބިގެންދާނެ.'' ރައީސް ވިދާޅުވެފަވެއެވެ.

ރައީސް ވިދާޅުވީ، މި ހުރިހާ ކަމެއް ފުރިހަމަވެގެންދާއިރުގައި، މާލޭގެ ރައްޔިތުންނާއި، މާލޭގައި ދިރިއުޅޭ ރައްޔިތުންގެ ތެރެއިން ހުރިހާ ރައްޔިތުންނަށް، 18 އަހަރު ފުރިފައިވާ ކޮންމެ ރައްޔިތަކަށް ގެދޮރުވެރިކަން ހަމަޖެހިގެންދާނެކަމަށެވެ. އަދި އެމަނިކުފާނު ވަނީ އެ ޔަޤީންކަން ދިވެހި ރައްޔިތުންނަށް އަރުވާފައެވެ.

އިންސާފުވެރިކަން ކަށަވަރު

މިކަންކަމުން އިނގިގެން ދަނީ ރައީސް މުޢިއްޒުގެ ސަރުކާރުން ވަނީ ފްލެޓް ދިނުމުގައި އިންސާފުވެރިކަމާއެކު ކަންކަން ކުރިއަށް ގެންގޮސްފައިކަމެވެ. މިކަމުން ދައްކުވައިދެނީ ސަރުކާރުގެ ޝަފާފުކަމާއި، އިންސާފުވެރިކަމެވެ. އަދި މިއީ ރައްޔިތުންނަށް އިންސާފު ހޯދައިދިނުމަށް ސަރުކާރުން ކުރަމުންދާ މަސައްކަތުގެ ދިރިހުރި މިސާލެކެވެ.

ފާހަގަކޮށްލެވޭ އަނެއްކަމަކީ، މިއީ ރައީސް މުޢިއްޒުގެ ސަރުކާރުން ހުރިހާ ކަމެއްގައި ވެސް އިންސާފުވެރިވެ، ރައްޔިތުންގެ ޙައްޤުތަކަށް ހުރުމަތްތެރިކޮށް ހިތަމުން އަންނަކަން ދައްކުވައިދޭ ކުލަގަދަ މިސާލެއް ކަމެވެ.