އިނގިރޭސި އެފް.އޭ ކަޕުގެ 4 ވަނަ ބުރުން ލިވަރޕޫލް ކަޓުވާލުމަށްފަހު މިހާތަނަށް އައިސްފައިވާ ދެވަނަ ޑިވިޝަނުގެ ރެލިގޭޝަނުގައި އޮތް ޕްލިމަތު އާގައިލް ބަލިކޮށް މެންޗެސްޓަރ ސިޓީ ކުއާޓަރ ފައިނަލަށް ދަތުރުކޮށްފިއެވެ.
ރޭގައި ސިޓީގެ ދަނޑުގައި ކުޅެވުނު މިމެޗުގައި ސިޓީގެ ނީކޯ އޯރެއިލީ ޖެހި ދެ ލަނޑުގެ އެހީގައި މެންޗެސްޓަރ ސިޓީން ވަނީ 3-1 އިން މެޗު ކާމިޔާބުކޮށްފައެވެ.

މެޗުގެ ފުރަތަމަ ބައިގައި މަކްސިމް ޓަލޮވިއެރޮވްގެ ލަނޑުން ޕްލިމަތު އާގައިލް ކުރިއަށް ދިޔަ ނަމަވެސް، ސިޓީގެ ޕްރެޝަރުގެ ސަބަބުން އެ ލީޑް ދެމެހެއްޓޭގޮތް ނުވިއެވެ. ފުރަތަމަ ބައި ނިމުމުގެ ކުރިން އޯރެއިލީގެ ލަނޑުން ސްކޯ އެއްވަރުކުރުމަށްފަހު، ދެވަނަ ބައިގައި އޭނާގެ ދެވަނަ ލަނޑާއި ކެވިން ޑި ބްރޫއިންގެ ލަނޑުން މެޗު ނިންމާލިއެވެ.

Ad by Hajj Corporation

މެޗުގެ ފެށިގެން ނިމުމާއި ހަމައަށް ސިޓީއިން ވަނީ ވަރުގަދަ ކުޅުމެއް ކުޅެފައެވެ.ނަމަވެސް މެޗުގެ 38 ވަނަ މިނެޓުގައި ޕްލައިމައުތްގެ ޓަލޮވިއެރޮވް ޖެހި ލަނޑުން ޕްލިމަތުވަނީ ލީޑު ނަގާފައެވެ. ނަމަވެސް ފުރަތަމަ ހާފުގައި އޮރައިލީގެ ގޯލުން ނަތީޖާ ހަމަކޮށް، އިތުރު ދެގޯލް ދެވަނަ ހާފުގައި ވަނީ ޖަހާފައެވެ.

އެފްއޭ ކަޕަކީ މި ސީޒަންގައި ސިޓީއަށް ތަށިލިބުމުގެ ފުރުސަތުއޮތް ހަމައެކަނި މުބާރާތެވެ. މީގެކުރިން ސިޓީ ވަނީ ލީގު ކަޕާއި ޗެންޕިއަންސް ލީގުން ކަޓާފައެވެ. އަދި ލީގުގައި ސިޓީ އޮތީ އެއްވަނައިގައިވާ ލިވަރޕޫލަށްވުރެ 20 ޕޮއިންޓް ދަށުގައި ތާވަލުގެ 4 ވަނައިގައެވެ.