މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން އިން ގަބޫލު ނުކުރަން ނިންމާފައިވާ ރާއްޖެއިން ބޭރުގެ ޕީއެޗްޑީ ކޯހެއްގެ ސެޓްފިކެޓް ގަބޫލުކުރަން ހައި ކޯޓުން ކުރި ހުކުމް، އިސްތިއުނާފު ކުރަން އެ އިދާރާއިން ނިންމައިފިއެވެ.

މި މައްސަލައަކީ ފިލިޕީންސްގެ އެލްޑާސްގޭޓް ކޮލެޖުން ސަނަދު ލިބޭ ގޮތަށ،ް ސްރީލަންކާގެ އެއިމްސް ކޮލެޖުގައި ހިންގި ޑޮކްޓާ އޮފް ފިލޯސޮފީ ކޯހެއްގައި، އެމްކިއުއޭގެ ހުއްދައާ އެކު ރާއްޖޭގެ ދަރިވަރުންތަކެއް ބައިވެރިވެ، ފަހުން އެ ކޯސް ގަބޫލުނުކުރާނެ ކަމުގައި އެމްކިއުއޭއިން ނިންމުމާ ގުޅިގެން ފެންމަތިވި މައްސަލައެކެވެ.

އެގޮތުން އެ މައްސަލައިގައި ކަން ހިނގި ގޮތަކީ، ޕިލިޕީންސްގެ އެލްޑަސްގޭޓް ކޮލެޖުން ސަނަދު ލިބޭގޮތަށ،ް ސްރީލަންކާގެ އެއިމްސް ކޮލެޖުގައި ހިންގި ޑޮކްޓަ އޮފް ފިލޯސޮފީ ޕްރޮގްރާމަކީ އެމްކިއުއޭގެ ސަނަދުގެ ފެންވަރު ބެލުމުގެ އުޞޫލުގެ ދަށުން ސަނަދު ދޫކުރާ މަރުކަޒު ހުންނަ ޤައުމުގެ ސަރުކާރުން ޤަބޫލުކުރާ ސަނަދެއްތޯ ބެލުމަށް އެ ދަރިވަރުންތައް އެމްކިއުއޭއަށް ހުށަހެޅިއެވެ. އަދި އެ ސިޓީއަށް ޖަވާބުދީ، އެ ޕްރޮގްރާމަކީ ގަބޫލުކުރާ ޕްރޮގްރާމެއް ކަމުގައި ބުނެ އެމްކިއުއޭއިން 28 ސެޕްޓެމްބަރު 2016 ގައި ލިޔުން އެ ދަރިވަރުންނަށް ދޫކުރިއެވެ.

އެހެން ނަމަވެސް އެ ދަރިވަރުން ކިޔެވުން ކުރިއަށް ގެންދަނިކޮށް، ޕިލިޕީންސްގެ އެލްޑާސްގޭޓް ކޮލެޖުން ސަނަދު ލިބޭގޮތަށް، ސްރީލަންކާގެ އެއިމްސް ކޮލެޖުގައި ހިންގި ޕީއެޗްޑީ ޕްރޮގްރާމާ ބެހޭ ބައެއް ކަންތައްތައް އެމްކިއުއޭއިން ބަލާތީ،ީ އެ ކޯހުގައި ބައިވެރިވާ ފަރާތްތަކުގެ ބޭނުމަށް ދޫކުރާ "އިންސްޓިޓިއުޓް އެންޑް ޕްރޮގްރާމް ރިކޮގްނިޝަން" ދޫކުރުން 2018 ޖަނަވަރީ މަހުން ފެށިގެން ވަގުތީ ގޮތުން ހުއްޓާލާފައިވާކަމުގައި ބުނެ އެ އިދާރާއިން 22 ފެބްރުވަީ 2018 ގައި ސާކިއުލާއެއް ނެރުނެވެ.

އަދި އެ ޕްރޮގްރާމުގައި އެއްވެސް ދަރިވަރަކު ކިޔަވަމުންދާނަމަ، 15 މާރިޗް 2018 ވަނަ ދުވަހުގެ މެންދުރު 2:00 ގެ ކުރިން އެމްކިއުއޭއަށް އެންގުމަށާއި، އަދި އެ ފަދައިން އަންގާއިރު ޕީއެޗްޑީ ޕްރޮގްރާމްގައި ބައިވެރިކުރުމަށް އެ ފަރާތުން ދޫކޮށްފައިވާ ލިޔުމުގެ ކޮޕީ އާއި ކިޔަވަންފެށި ތާރީޚު އެނގޭ ގޮތަށް އެ އިދާރާއަށް ހުށަހެޅުމަށް އެމްކިއުއޭއިން އެންގިއެވެ.

އެއާއެކު 29 މާރިޗު 2018 ގައި އެމްކިއުއޭއިން "ސްރީލަންކާގެ އެއިމްސް ކޮލެޖުގައި ޕ.އެޗ.ޑީއަށް ކިޔަވަމުންދާ ދަރިވަރުންގެ ސަނަދު ބަލައިގަތުމާމެދު މި އޮތޯރިޓީގެ ނިންމުން"ގެ ނަމުގައި އުސޫލެއް ފާސްކުރިއެވެ. އެގޮތުން އެ އުސޫލުގެ ދަށުން، ީ ޕިލިޕީންސްގެ އެލްޑަސްގޭޓް ކޮލެޖުން ސަނަދު ލިބޭގޮތަށް، ސްރީލަންކާގެ އެއިމްސް ކޮލެޖުގައި ހިންގި ޕީއެޗްޑީ ޕްރޮގްރާމްގައި ބައިވެރިވެފައިވާ ފަރާތްތަކަށް ދޫކުރާ "އިންސްޓިޓިއުޓް އެންޑް ޕްރޮގްރާމް ރިކޮގްނިޝަން" ލިޔުން ދޫކުރުން ހުއްޓާލަން އެ އިދާރާއިން ނިންމައި، އެ ޕްރޮގްރާމްތައް ގަބޫލުނުކުރުމަށް އެ އިދާރާއިން ނިންމިއެވެ.

އެއާއެކު، އެ ކޯހުގައި ބައިވެރިވި ތިން ދަރިވަރަކު، އެމްކިއުއޭއާ ދެކޮޅަށް ސިވިލް ކޯޓަށް 2021 ވަނަ އަހަރު މައްސަލައެއް ހުށަހެޅިއެވެ. އެހެން ނަމަވެސް އެ މައްސަލައިގައި ސިވިލް ކޯޓުން ޙުކުމް ކުރީ، އެ ޕްރޮގްރާމް އެކްރެޑިޓް ކުރަން އެމްކިއުއޭއަށް އަމުރުކުރެވޭނެ ތަނެއް ނެތް ކަމަށެވެ.

އެގޮތުން އެ މައްސަލަ އިސްތިއުނާފު ކުރުމަށް 2021 ވަނަ އަހަރުގެ ނޮވެމްބަރުމަހުގެ ތެރޭގައި ހައި ކޯޓަށް ހުށަހެޅުނު މައްސަަލައިގައި، ހައި ކޯޓުން ވަނީ އެ ދަރިވަރުންގެ ޕީއެޗްޑީ ސެޓްފިކެޓް ގަބޫލުކުރަން އެމްކިއުއޭގެ މައްޗަށް އަމުރުކުރުކޮށްފައެވެ.

އެހެން ނަމަވެސް އެކަމާ ގުޅިގެން އެމްކިއުއޭއިން "އެކްސް"ގައި ކުރި ޕޯސްޓެއްގައި ބުނީ، ހައިކޯޓުގެ ނިންމުން ސުޕްރީމު ކޯޓުގައި އިސްތިއުނާފުކުރަން ނިންމާފައިވާ ކަމަށެވެ.